Tahirə

Mədəniyyətimiz dünyada

Bu günlərdə "Simurq" Azərbaycan Mədəniyyəti Asossiasiyasının prezidenti alim, Dövlət İdarəçilik Akademiyasının professoru Fuad Məmmədov Almaniyada qeyri-rəsmi səfərdə olub. Almaniyanın Frankfurt, Köln, Bonn, Mayns və Koblens şəhərlərində olan professor Azərbaycan mədəniyyətinin təbliğinə xüsusi yer ayırıb. F. Məmmədov “Alman dalğası” radiosunda 15 dəqiqəlik çıxış edib. Kulturologiya ilə bağlı kitabının ətrafında qurulan müzakirələr zamanı o, Azərbaycan və dünya mədəniyyəti, ölkəmizin çağdaş sivilizasiya yolunda atdığı addımlar, eləcə də mədəniyyətlərarası dialoqda rolu və mövqeyindən danısıb.

F.Məmmədov Bonn şəhərində yaşayan qafqazşünas alim Yeva Mariya Auxla görüşü zamanı Azərbaycan və alman kulturoloqlarının əməkdaşlıq etməsi barədə razılığa gəliblər. O, Mayns şəhərində olarkən Sosial-Tədqiqatlar İnstitutunda olub və səfərdən qayıdandan sonra həmin institutdan təşəkkür məktubu almaqla yanaşı, əməkdaşlıq etmək üçün təkliflər alıb.

Frankfurtda Azərbaycan Mədəniyyət Cəmiyyəti, türk diasporu ilə görüşən F.Məmmədov onların Almaniyada keçiriləcək Azərbaycan günlərinə hazırlaşdıqlarının şahidi olub. Eyni zamanda diaspor təşkilatlarımız alman mədəniyyətini daha dərindən öyrənib bundan öz milli inkişafımız üçün istifadə etməyi arzulayır.

Daha sonra Kölndə olan F.Məmmədov Azərbaycan diasporunun nümayəndələri, o cümlədən "Zərifə ART" təşkilatı, Almaniyada təhsil alan, azərbaycanlı tələbələr, ziyalılar, incəsənət xadimləri ilə görüşlər keçirib. Eyni zamanda o, "Simurq" Azərbaycan Mədəniyyəti Asossiasiyasının Almaniyadakı nümayəndəsi, tanınmış rəssam Əşrəf Heybətovla görüşüb. Əşrəf Heybətovun Almaniyanın müxtəlif şəhərlərində böyük sərgilər keçirərək, Azərbaycan mədəniyyətinin təbliğ etdiyini qeyd edən F.Məmmdov hazırda onun belə bir sərgini YUNESKO-nun qərargahında keçirməyə hazırlaşdığını dedi. Əşrəf Heybətov Avropada Azərbaycan Mədəniyyət Xadimləri Cəmiyyəti yaradıb bu xətlə bir çox nüfuzlu adamları Azərbacyana gətirə bilər ki, həmin insanlar bizim mədəniyyətimizi sevməklə gələcəkdə dünyaya Azərbaycan haqqında müsbət rəylər yaya bilərlər. Fuad Məmmədov hesab edir ki, xaricdə yaşayan və nüfuza malik olan görkəmli simalarla sıx əlaqələr qurub və onları dəstəkləməklə həmin adamların öz vətəni, sosial mədəni tərəqqisi, beynəlxalq nüfuzu üçün xidmət göstərməsinə imkan yaratmaq olar.

O, ziyalıların, alimlərin xaricdəki diasporalarla əlaqələrinin sıx olmasını mədəniyyətlərin əlaqəli şəkildə inkişafı üçün vacib sayırdı. Alimin fikrincə, həmin əlaqələr hansısa rəsmi tədbirdən-tədbirə deyil, daha harmonik şəkildə olmalıdır.

Paritet.-2007.-7-9 iyul.- S. 8.