Eloğlu Z.

"Gülüstançılar" "Qüdsi" filmində çəkiliblər

"Eşidəndə ki, Abbasqulu Ağa Bakıxanovun ədəbi yadigarı olan "Gülüstan bu gün elmi-ədəbi məclis kimi öz fəaliyyətini davam etdirir, bu məni hədsiz dərəcədə sevindirdi". Azərbaycan Televiziyası Telefilm Yaradıcılıq Birliyi istehsalat şöbəsinin rəhbəri, tanınmış kinotarixçi və kinematoqraf Aydın Həsəni "Gülüstan" elmi-ədəbi məclisinin sədri Şıxməmməd Seyidməmmədovla söhbətində belə dedi. Və əlavə etdi ki, "bu fakt məni filmin çəkilişi üçün daha da ruhlandırdı. Axı, filmdə əyanilik üstünlük təşkil edəcəkdir". Məlumat üçün onu da bildirək ki, görkəmli kino xadimlərimizdən olan Aydın müəllim 120-dən çox televiziya sənədli və bədii filmini ərsəyə gətirib. "Papaq", "Kişi sözü" və başqa ekran əsərləri tamaşaçı marağından düşmür. A.Həsəninin rəhbərliyi altında A.A. Bakıxanovun həyat və fəaİiyyətinə, ədəbi irsinə həsr edilmiş "Qüdsi" filminin çəkilişi başa çatmaq üzrədir. Tarixdən məlumdur ki, böyül mütəfəkkir A.A.Bakıxanov "Qüdsi" təxəllüsü ilə klassik ədəbiyyatımızda məşhurdur. O, ədəbi yaradıcılığının müəyyən hissəsini Qubanın Amsar kəndindəki malikanəsində davam etdirib, 1835-ci ildən isə Qubada “Gülüstan” adlı ədəbi məclisin əsasını qoyub. Qubalı şairsevərlər artıq 170 ildən çoxdur ki, bu ədəbi abidəni qoruyur, onun fəaliyyətini davam etdirirlər. "Qüdsi" filmində də bu, öz əksini tapıb. Filmin quruluşçu rejissoru Cahangir Mehdiyev, quruluşçu operatoru Mahir Cahangirov, inzibatçı Arif Həkimoğlu, quruluşçu rəssam Nabat Məhərrəmova, qrim ustası Solmaz Hüseynovadır. Filmin Qubada çəkilişi bir neçə gün davam edib. Quba şəhərinin ümumi görünüşü Qudyalçay ərazisi, digər təbiət abidələri, A.A.Bakıxanovun Amsar kəndindəki ev muzeyi, şəhərdəki A.A.Bakıxanov adına ölkə-diyarşünaslıq muzeyi, görkəmli maarifçi filosofun adını daşıyan klub və abidəsi ekranlaşdırılıb. Maraqlı haldır ki, "Gülüstan" elmi-ədəbi məclisinin üzvləri ilə çəkiliş şəhərdəki "Səkinə-xanım" məscidində aparılıb. Ekranda o dövrün məclis üzvlərindən Molla Zeynalabdin, Mahmud Nafe, Hacı Şirvani, Məhərrəmov Məriz, Əbülfət Tuti, İbrahim Nicati kimi ədəbi personajlar müasir "Gülüstan"dan Qafar Süleyman, Malik Xəlil Ağagüloğlu, Güləli Bağban, Pirəli Büklü, Şıxəmməd Seyidməmədov, Zakir Eloğlu, Zakir Teymurov, Umudşah Ağabalayev və başqalarının ifasında ekrana köçürülüb.

Azad Azərbaycan.- 2007.- 15 iyul.- S. 7.