Fehruz

Sisyanovun çadırı kinostudiyanın həyətində

İki seriyalı “Cavad xan” filminin çəkilişləri ay yarımdan sonra başa çatır

Bu günlərdə "Azərbaycan-film" kinostudiyasının həyətində çadır qurulduğunun şahidi olduq. Bir neçə gün həmin çadıra kimsə yaxın düşmədi. Kinostudiyanın ərazisi olduğu üçün yəqin etmək olardı ki, həmin çadır hansısa filmin çəkilişləri üçün qurulub. Nəhayət ki, həmin çadırın sakinləri gəlib çıxdı. Redaksiyadakılar çoxdan getmişdi. Bəzi materialları oxuyandan sonra məcburən digər işlərimlə bağlı sənədləri də gözdən keçirməli oldum. Bir də ayıldım ki, artıq saat 21-i göstərir. Redaksiyanın pəncərələrini bağlamaq istəyəndə məlum çadırın qarşısında qızğın iş getdiyini gördüm.

Pəncərələri bağlayıb çadıra baş çəkməyi qərara aldım. Məlum oldu ki, "Cavad xan" filminin çəkiliş qrupu öz "köçünü" bu dəfə kinostudiyanın həndəvərinə salıb. Filmin rejissoru Rövşən Almuradlı ilə görüşüb çadıra keçdim. İrandan gətirilmiş operator qrupu işıqları qururdu. Ramiz Novruzov bir kənarda, "Cavad xan" isə (Nurəddin Mehdixanlı) yanındakı gəncə fəlsəfə və vətənpərvərlik mövzusundan danışırdı. Çox keçməmiş "erməni keşişlər" damaqlarında qırmızı filtirli siqaret sümürə-sümürə rejissora yaxınlaşdılar.

Çəkilişə hazırlıq bir azdan başa çatacaqdı. Rejissorun bildirdiyinə görə, həmin gün səhər saatlarına qədər çəkilişlər davam edəcəkdi. Beləliklə, Sisyanovun çadırında baş verənlər kinostudiyanın həyətində bir neçə günə hazır oldu...

Filmin çəkilişləri ilə bağlı daha ətraflı məlumat üçün "Bizim kino" Prodüser Mərkəzinin istehsalı olan "Cavad xan" filminin prodüseri Heydər Dadaşovla görüşdük. Onun bildirdiyinə görə, filmin bölgələrdəki çəkilişləri başa çatıb. Artıq "Azərbaycanfilm" kinostudiyasının pavilyonunda buradakı çəklişlər üçün dekorasiyalar qurulur. Cavad xanın divanxanası, kitabxana, Alban kilsəsinin daxili çəkilişləri pavilyonda aparılacaq. Bundan başqa gürcü çarının ziyafət səhnəsi Əlyazmalar institutunun binasında çəkiləcək. H.Dadaşov bildirdi ki, kitabxananın yanma səhnəsində kompüter qrafikasından istifadə olunacaq.

Pavilyon çəkilişlərinin bir hissəsinin artıq çəkildiyini deyən prodüser qeyd etdi ki, Alban kilsəsi, Sisyanovun çadırı və digər natura çəkilişləri bölgələrdə aparılıb.

O, aktyor oyunundan maraqla danışaraq qeyd etdi ki, filmin gözəl alınması üçün hamı əlindən gələni edir. "Mən bütün aktyor heyətindən tam razıyam". Heydər Dadaşov vurğuladı ki, regionlardakı çəkilişlərdə Mədəniyyət və Turizm Nazirliyi, xüsusən də kinematoqrafiya şöbəsi böyük köməklik göstərib. Məhz kinematoqrafiya şöbəsinin yardımı ilə çəkilişlərin aparılması üçün filmin yaradıcı heyətinə gözəl şərait yaradılıb.

Əlavə edək ki, ikihissəli bədii filmin çəkilişlərinin avqustun sonlarına qədər başa çatacağı gözlənilir.

Kino+.- 2007.- 13 iyul.- S. 3.