Vüsal

"Mozalan"ın 183-cü nömrəsinin çəkilişləri davam edir

Studiyadan aldığımız məlumata görə süjetlərdən biri animasyon film olacaq

"Mozalan" studiyasının bu yaxınlarda təyin olunmuş yeni direktoru Orxan Fikrətoğlu televiziya və qəzetlərə verdiyi müsahibələrində studiyanın işində yeniliklər olacağını, bu studiyada gənclər üçün kurslar keçiriləcəyini və onlarla işləyəcəyini vurğulamışdı. Artıq yeni rəhbərliyin gəlişindən sonra studiyada 183-cü nömrə istehsalata buraxılaraq iki süjet - "Məna" və "Vətənpərvər" çəkilibdir. Üçüncü isə "Milli əjdaha" animasiyon film olacaq. Qeyd edək ki, filmlərin ssenarilərinin mövzusu xalq əfsanə və nağıllarından götürülüb. Ümumiyyətlə, bundan sonra "Mozalan"ın hər nömrəsində bir film animasion olacaq. Bütün bunlara dolğun cavab almaq üçün "Mozalan" studiyasına baş çəkdik. Studiyanın yeni təyin olunmuş inzibati şöbəsinin müdiri, tanınmış aktyor Şamil Süleymanovla görüşdük.

"Mozalan" studiyasındakı son prosesləri Şamil müəllim belə izah etdi: "Planlarımıza dəstək olan var. Bilirsiniz, bütün arzuları bəri başdan iş kimi xarakterizə etmək düzgün deyil. Amma danışıqlar gedir və planlar var. Mədəniyyət və Turizm Nazirliyində müsbət qarşılanıb bu planlar. Hazırda isə yeni rəhbərlik təyin olunduqdan sonra ilk nömrə istehsalata buraxılıb. Bu ümumilikdə "Mozalan"ın 183-cü nömrəsidir. "Məna" adlanan süjetin rejissoru Nicat Feyzullayev, "Vətənpərvər" adlanan süjetin rejissoru isə Vaqif Azəryardır. Onu da deyim ki, nömrənin üçüncü süjetinin animasion olmasını istəyirik və bu təklifimizi bəyəniblər. Animasiyanın adı "Milli əjdaha"dır. Film artıq istehsalata buraxılmaq üzrədir".

Şamil müəllimdən gənclərlə bağlı planlar barədə də soruşduq. İnzibati şöbənin müdirinin cavabı belə oldu: "Düzdür, biz ilk işimizdə sırf peşəkarlardan istifadə etmişik. Rejissorlar, ssenaristlər və aktyorlar hamısı peşəkarlardır. İlk olaraq işimiz səviyyəli olsun deyə bu addımı atdıq. Həm də “Mozalan”ın necə deyərlər adı ağırdır. Birinci nömrədən tamaşaçılara köhnə “Mozalan”ı xatırlatmaq üçün gənclərin eksperimenti ilə buna nail olmaq mümkün deyildi. Məncə, bizim yerimizdə kim olsaydı bu addımı atardı. Amma bu o demək deyil ki, gənclərlə işləmək istəmirik. Onların hər cəhətdən "Mozalan" təcrübəsi olması üçün biz studiyanın tərkibində kurslar təşkil edəcəyik. Vaxtilə "Mozalan"da işləmiş tanınmış rejissor-ssenaristləri dəvət edib gənclərlə görüşdürmək fikrindəyik. "Mozalan"çı gənclər yetişdirib onlarla da işləyəcəyik".

Süjetlərin mövzuları ilə də maraqlandıq. Həm də il ərzində studiyanın neçə nömrə istehsalata buraxacağı da diqqət çəkən məsələlərdəndir. Çünki çoxlu iş nəticəsində yeniliklər peyda ola bilir. Bütün bunlar barədə Şamil müəllimin dediklərindən: "Mövzular komik olsa da məna etibarilə ağırdır. Çalışmışıq ki, "Mozalan"ın köhnə ab-havasını qaytaraq. Amma yeni üslubda... Tamaşaçılar tanınmış el lətifələrini də Mozalan yozumunda görə biləcəklər. "Mozalan"ın köhnə şöhrətini yeni üslubda bərpa edəcəyik. İstehsalatdan da çox şey asılıdır. İlkin olaraq ikidən çox nömrə istehsal etmək fikrindəyik. Yoxsa ildə bir nömrə ilə heç bir iş görmək mümkün deyil".

Son zamanlar telekanallar (əsasən Az TV və ANS) "Mozalan" studiyasının süjetlərini yayımlamaqda fəallıq göstərir. Hamı təşəbbüsün "Mozalan" studiyasının yeni rəhbərliyi tərəfindən göstərildiyini vurğulayır. Şamil müəllim bu barədə belə dedi: "Az TV həftə içi altı gün, ANS həftədə bir dəfə “Mozalan”ın süjetlərini yayımlayır. Bunun özü də təbliğatın bir formasıdır. Necə deyərlər, nəhayət, ki göstərilməyə başlandı. Kimin təşəbbüsü olmasına baxmayaraq "Mozalan"ın telekanallarda verilməsi yaxşı addımdır. Amma təkcə süjetlərin yayımlanması yox, “Mozalan”ın ayrıca təqdimata da ehtiyacı var".

Kino+.- 2007.- 13 iyul.- S. 7.