Cövdət
Hacıyev 90 il əvvəl Şəkidə dünyaya göz
açmışdır. Azərbaycan Dövlət Konservatoriyasını,
Moskva Konservatoriyasını
bitirmişdir. İllərlə
sevib-seçdiyi sənətdən
dərs demiş, konservatoriyanın direktoru işləmişdir. İstedadlı
bəstəkar, pedaqoq
idi. Xalq artisti fəxri adı və dövlət mükafatları,
orden-medallar almışdı. "Simfoniya", "Azərbaycan
süitası", Qara
Qarayevlə birlikdə
"Vətən" operasını
yazmışdır.
Bu günlərdə Azərbaycan Dövlət Filarmoniyasında görkəmli
sənətkarın yubileyi
təntənə ilə
qeyd edildi. Tədbiri giriş sözü ilə açan mədəniyyət
və turizm nazirinin müavini Ədalət Vəliyev dedi:
- Dünya şöhrətli
bəstəkar, dahi şəxsiyyət Üzeyir
bəyi həm yaradıcılığına, həm də alicənablığına, qayğıkeşliyinə
görə hörmətlə,
ehtiramla xatırlayırıq.
O, neçə-neçə gəncə, musiqiyə marağı olanlara atalıq qayğısı
göstərmiş, köməyini
əsirgəməmişdir. 90 yaşını qeyd etdiyimiz mərhum Cövdət Hacıyev də son nəfəsinə qədər
qazandığı uğurlara
görə Üzeyir bəyə minnətdar olmuşdu. Bəstəkarın "Vətən" operası dünyanın bütün ölkələrində
məşhurdur. Tam əmin
ola bilərik
ki, Cövdət Hacıyev musiqi mədəniyyəti tariximizdə
və onu sevənlərin yaddaşında
əbədi yaşayacaqdır.
Sonra Azərbaycan Bəstəkarlar
İttifaqı İdarə
Heyətinın yeni seçilmiş sədri, xalq artisti Firəngiz
Əlizadəyə söz
verildi. O dedi:
- Yaxşılıq heç
vaxt yaddan çıxmır. Müəllimim olmuş Cövdət Hacıyevi tanıdığım
gündən ondan mərhəmət, hörmət
görmüşəm. Yaradıcılığımda qazandığım uğurlara görə mərhum sənətkarımızın
əziz xatirəsinə
ehtiramımı bildirirəm.
O, olduqca sadə, şirindil, həssas duyumlu, diqqətcil insan idi. Sənətlə bağlı unudulmaz bəstəkarımızdan çox
mətləbləri öyrənmişəm.
Musiqi və sənətsevərlərin
istəyi, arzusu ilə Bəstəkarlar İttifaqının sədri
seçilmişəm. Var gücümlə çalışacağam
ki, unudulmaz bəstəkarlarımız, onların
əsərləri təbliğ
olunsun, yaşasın.
Nəzərdə tutmuşuq
ki, Cövdət müəllimin əsərləri
yeni quruluşda oynanılsın, lent təsvirlərində
səslənsin və
canlandırılsın.
Yubiley mərasimində qeyd olundu ki, görkəmli
bəstəkar həm
də nümunəvi ailə başçısı
idi. Onun ömür-gün yoldaşı, xalq artisti Əminə xanım Dilbazi milli rəqslərimizin mahir ifaçısı kimi tanınıb. Dörd övladının üçü
hazırda atalarının
yolunu layiqincə davam etdirir.
Tədbirin bədii hissəsi
tamaşaçılar tərəfindən
maraqla qarşılandı.
Xalq artisti Rauf Abdullayevin rəhbəri və baş dirijoru olduğu Ü.Hacıbəyov
adına Azərbaycan Dövlət Simfonik Orkestrinin ifasında yubilyarın oğlu İsmayıl Hacıyevin dirijorluğu ilə mərhum bəstəkarın
bir sıra əsərləri, o cümlədən
III və IV simfoniyaları,
xalq artistləri Fidan Qasımovanın ifasında "Ey gül", Fərhad Bədəlbəylinin ifasında
"Ballada" (fortepiano üçün),
Şahlar Quliyevin ifasında "Vətən"
operasından Mərdanın
ariyası, əməkdar
artist Yeganə Axundovanın
ifasında "Skerso"
(Fortepiano və orkestr
üçün) və
digər əsərləri
yüksək peşəkarlıqla
səsləndi və alqışlarla qarşılandı.
Sonda bəstəkarın oğlu
İsmayıl Hacıyev
atasına, onun sənətinə göstərdikləri
diqqət və qayğıya görə Mədəniyyət və
Turizm Nazirliyinin, Dövlət Filarmoniyasının
rəhbərlərinə ailələri
adından minnətdarlığını
bildirdi.
Azərbaycan.-2007.-3
iyul.-S.7.