Mədəniyyətimizin və mədəni incilərimizin hamisi" kitabının təqdimatı olmuşdur

İyulun 6-da Azərbaycan Dövlət Filarmoniyasında Mədəniyyət və Turizm Nazirliyinin, Beynəlxalq Musiqi Şurası Azərbaycan Milli Komitəsinin nəşr etdirdiyi "Mədəniyyətimizin və mədəni incilərimizin hamisi" kitabının təqdimatı keçirilmişdir. Heydər Əliyev Fondunun və Azərbaycan Mədəniyyətinin Dostları Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı, Azərbaycanın birinci xanımı Mehriban Əliyevanın mədəniyyət sahəsində fəaliyyətinə dair dövri mətbuat materiallarının (1995-2007-ci illər) toplandığı, Milli Elmlər Akademiyasının müxbir üzvü Sevda Məmmədəliyevanın tərtibçisi və redaktoru olduğu kitab YUNESKO-nun baş direktoru Koişiro Matsuuranın sözləri ilə açılır: "Azərbaycanın birinci xanımı Mehriban xanım Əliyeva on il bundan öncə Azərbaycan Mədəniyyətinin Dostları Fondunu yaratmış və həmin Fondun çərçivəsində böyük işlər görülmüşdür. Mən onun bu sahədəki fəaliyyətini izləyir və yaxından öyrənirdim. Mən gördüm ki, bu sahədə Mehriban xanımın xidmətləri əvəzsizdir
İndi o, nəinki Azərbaycanda, həm də regional miqyasda, hətta deyərdim ki, qlobal miqyasda fəaliyyət göstərir".
Mərasim iştirakçıları əvvəlcə Mehriban xanımın mədəniyyətimizə qayğısını əks etdirən videofilmə baxmışlar.
Tədbiri açan mədəniyyət və turizm naziri Əbülfəs Qarayev YUNESKO-nun xoşməramlı səfiri təyin olunduqdan sonra Mehriban xanımın Azərbaycan mədəniyyətinin inkişafı, qeyri-maddi mədəni irsin, o cümlədən muğamın qorunması, təbliği, onun bəşəriyyətin inciləri siyahısına daxil edilməsi sahəsində böyük işlər gördüyünü vurğulamışdır. O demişdir ki, bu kitabda toplanmış materiallar Heydər Əliyev Fondunun və Azərbaycan Mədəniyyətinin Dostları Fondunun həyata keçirdiyi tədbirlərin yalnız bir qismini əks etdirir. Gənclərimiz bu kitabdan bəhrələnməklə özləri üçün xalqımıza və ölkəmizə, Azərbaycanın xoşbəxt gələcəyinə xidmət örnəyi seçəcək, mənəvi fayda götürə biləcəklər. Nazir Azərbaycan Prezidentinin qayğısına cavab olaraq, mədəniyyət işçilərinin daha səylə işləyəcəklərini vurğulamış, təqdim olunan kitabın rus və ingilis dillərində də nəşrinin hazırlandığını bildirmişdir.
Rəssamlar İttifaqının sədri, xalq rəssamı Fərhad Xəlilov, Yazıçılar Birliyinin katibi, xalq yazıçısı Çingiz Abdullayev, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, AMEA-nın Memarlıq və İncəsənət İnstitutunun direktoru, akademik Rasim Əfəndiyev, Milli Konservatoriyanın rektoru, xalq artisti Siyavuş Kərimi çıxışlarında Mehriban xanımın rəhbərliyi ilə Heydər Əliyev Fondunun gördüyü genişmiqyaslı işlərdən danışmışlar. Bildirilmişdir ki, Qobustan tarixi-bədii və İçərişəhər tarixi-memarlıq qoruqlarının YUNESKO-nun Dünya Mədəni İrs siyahısına salınmasında, oncildlik "Azərbaycan xalq musiqisinin antologiyası" adlı fundamental tədqiqat əsərinin 7 cildinin nəşrində, "Muğam-antologiya" layihəsi çərçivəsində Səfiyəddin Urməvinin "Şərəfiyyə risaləsi" və "Kitabi-ədvar", Fətullah Şirvaninin "Musiqi məcəlləsi" əsərlərinin çap olunmasında Mehriban xanımın şəxsi təşəbbüsü böyük rol oynamışdır. Hazırda onun rəhbərliyi altında "Muğam ensiklopediyası" hazırlanır, Muğam Mərkəzi inşa edilir. Xüsusi vurğulanmışdır ki, Mehriban xanımın şəxsiyyətinə, onun milli və ümumbəşəri mədəniyyətin tərəqqisi naminə fəaliyyətinə ictimai maraq çox yüksəkdir. Təqdim olunan kitab buna bir növ cavabdır. Nəşrdə yeddi bölmədə qruplaşdırılmış materiallarda ölkənin birinci xanımının tarixi keçmişimizə sədaqəti, xalqımızın milli-mədəni dəyərlərinə övlad qayğısı barədə geniş məlumat verilir. Oxucular Mehriban Əliyevanın əsl vətəndaş mövqeyinin, çoxcəhətli fəaliyyətinin ölkəmizin hüdudlarından kənarda, o cümlədən nüfuzlu beynəlxalq təşkilatlarda da çox yüksək qiymətləndirildiyini təsdiqləyən materiallarla da tanış ola biləcəklər.
Qara Qarayev adına Azərbaycan Dövlət Kamera Orkestri və respublikanın tanınmış incəsənət ustaları maraqlı konsert proqramı ilə çıxış etmişlər.

Azərbaycan.-2007.-7 iyul.-S.2.