Salmanov R.

Tədris ili başa çatdı, müvəffəqiyyətlər davam edir

Bülbül adına Musiqi Məktəbinin yaradıcılıq sevincləri ilə dolu tədris ili başa çatdı. Dərslər, imtahanlar artıq arxada qalmışdır. Şagirdlərin ifaçılıq təcrübələri püxtələşərək gündən-günə artır. Bütün bu prosesin ən böyük nəticəsi isə böyük səhnədir. İyunun 29-da M. Maqomayev adına Azərbaycan Dövlət Filarmoniyasında respublikanın xalq artisti, maestro Rauf Abdullayevin rəhbərlik etdiyi Üzeyir Hacıbəyov adına Azərbaycan Dövlət Simfonik orkestrinin müşayiətilə Bülbül adına Orta İxtisas Musiqi Məktəbi şagirdlərinin tədris ilinin yekununa həsr olunmuş ənənəvi hesabat konserti keçirildi.
Konsertə dəvətli qonaqlar sırasında respublikanın tanınmış incəsənət xadimləri, xarici ölkə səfirliklərinin nümayəndələri, eləcə də çoxluq təşkil edən gənc ifaçıların valideynləri vardı. Konserti giriş sözü ilə açan məktəbin direktoru, fəlsəfə elmləri doktoru professor Nigar Cərullaqızı təməli dahi bəstəkarımız Üzeyir Hacıbəyov tərəfindən qoyulmuş məktəbin 70 ildən çox tarixə malik olduğunu və bu illər ərzində musiqi mədəniyyətimizin inkişafı və tərəqqisində misilsiz xidmətləri olan dünya şöhrətli bəstəkar və musiqiçilər yetirdiyini qeyd etdi. Heç də təsadüfi olmayaraq məktəbin altı əlaçı şagirdinin Prezident təqaüdünə layiq görüldüyünü xüsusi qeyd etdi. Daha sonra mətbuata göstərdiyi diqqət və qayğıya görə Nigar Cərullaqızına Azərbaycan Kütləvi İnformasiya Vasitələri İşçiləri Həmkarlar İttifaqı rəyasət heyətinin qərarı ilə “Qızıl Qələm” mükafatı təqdim olundu.
Konsertdə X sinif şagirdi Zakir Teymurxanlının oxuduğu Üzeyir Hacıbəyovun “Arşın mal alan” operettasından — Əsgərin ariyası, XI sinif şagirdi Bəhruz Zeynalovun tarda ifa etdiyi H. Xanməmmədovun 2 saylı konserti, Prezident təqaüdçüsü, IV sinif şagirdi Nərmin Nəcəflinin, pianoda ifa etdiyi Motsartın 20 saylı konserti, Toğrul Hüseynli, Qəmər Mahmudova, Elmira Süleymanova, Anar Seyidov, Cəmilə Qarayusifli, Təhminə Abdullayeva və Ümidə Abbasovanın çıxışları tər çiçəklə və sürəkli alqışlarla qarşılandı.

Xalq qəzeti.- 2007.- 1 iyul.- S. 6.