Azərbaycan Evrovisiona yaxınlaşır

Bir müddət əvvəl İctimai Televiziyanın Avropa Yayımlar Birliyinə Azərbaycanın "Evrovision"da iştirakı ilə bağlı ünvanladığı müraciətə mənfi cavab verilməsi barədə müəyyən fikirlər səsləndirildi. Lakin şirkət nümayəndələri yayılan xəbəri təsdiq etməmişdi. Ötən gün xəbər aldıq ki, İctimai Televiziya və Radio Yayımları Şirkəti Avropa Yayımlar Birliyinə üzv qəbul edilib. Bu barədə şirkətin ictimaiyyətlə əlaqələr və monitorinq şöbəsindən məlumat verilib. Xəbərdə bildirilir ki, qərar Avropa Yayımlar Birliyinin İstanbulda keçirilmiş Baş Assambleyasında qəbul olunub. Dünyanın nüfuzlu yayım birliyinə qəbul olunması münasibəti ilə təşkilatın qərarını qurumun baş direktoru Æan Reveillon İTV-nin rəhbəri İsmayıl Ömərova ünvanlayıb. O, sıx əməkdaşlıq əlaqələrinin qurulmasını məktubda qeyd edib. Eyni zamanda vurğulanıb ki, birliyin müvafiq departamentləri sözügedən telekanalla daha yaxın əlaqə saxlayacaq, əməkdaşlarını müvafiq qanunlar və təcrübə keçmək üçün qaydalarla tanış edəcək.
Qeyd edək ki, bundan sonra İTV-nin xüsusi əhəmiyyət verdiyi əsas məsələlərdən biri Azərbaycanın "Evrovision" mahnı müsabiqəsində təmsil edilməsinə nail olmaqdır. Bu arada Əməkdar artist Tünzalə Ağayeva Azərbaycanı "Evrovision"da təmsil etmək niyyətini açıqlayıb. O bildirib ki, azərbaycanlı müğənnilərin bu müsabiqədə iştirakı musiqimizin dünyada tanınmasına səbəb olacaq. Müğənni eyni zamanda bildirib ki, İctimai Televiziyanın Avropa Yayımlar Birliyinə üzv qəbul edilməsi uğurlu nəticədir. Müğənni qeyd edib ki, bugünkü dövrdə Azərbaycan musiqisi ölkə hüdudlarını aşaraq dünya səhnəsində təmsil olunmalıdır. Bunun üçün o, ilk addım olaraq sözügedən müsabiqədə təmsil olunmağımızı vacib hesab edib. Müğənnilər arasında seçim aparanda öncə müğənni öz namizədliyini irəli sürüb. O bildirib ki, bir azərbaycanlı kimi bu müsabiqədə iştirak etmək onun da arzusu olub. Musiqi yarışmalarında kifayət qədər təcrübə topladığını xatırladan müğənni özünü dünya yarışmasına hazır gördüyünü vurğulayıb. Eyni zamanda T.Ağayeva söyləyib ki, ölkəmizi müsabiqədə təmsil edəcək yetərincə istedadlı gənclər var. Konkret ad çəkmək istəməyən müğənni sadəcə onu deyib ki, vacib olan bu müsabiqədə təmsil olunmağımızdır: "Aidiyyətli qurumlar var ki, kimin ora layiq olduğunu müəyyən edəcək".

Mövqe.-2007.-12-13 iyul.-S.13.