Hacızadə A.

Azərbaycan məktəbliləri beynəlxalq teatr - dramaturgiya layihəsində iştirak edirlər

MDB ölkələrindən və Rusiyadakı uşaq evlərindən gəlmiş 13-16 yaşlı yeniyetmələr "Klass Mira Rossiya - 2007" Beynəlxalq teatr-dramaturgiya layihəsində iştirak etmək məqsədilə Moskvaya toplaşmışlar. Layihəni "İqra-3000" Qeyri-kommersiya tərəfdaşlığı, Moskvanın "Sovremennik" Teatrı və Edinburqdakı "Travers" Teatrı Böyük Britaniyanın Rusiyadakı səfirliyinin dəstəyi ilə həyata keçirirlər. Layihənin tərəfdaşları Əlişir Usmanovun "İncəsənət və idman" Xeyriyyə Fondu və "Dialoq üçlüyü" investisiya şirkətidir.
Ölkəmizi istedadlı məktəblilər Aydın Qafarov, Aysel Axundova və Tamerlan Məmmədov təmsil edirlər. Layihənin Azərbaycandan olan iştirakçıların tərkibinin formalaşdırılmasında, habelə onların bu mötəbər tədbirdə iştirakının təşkilində Ailə, Qadın və Uşaq Problemləri üzrə Dövlət Komitəsi ilə sıx əməkdaşlıq şəraitində ölkəmizin Rusiyadakı səfirliyi fəal iştirak etmişdir. Azərbaycanlı uşaqlar 3 pyesdə - "Hər şey, ya heç nə", "İki əllə solo" və "Qarşılıqlı əlaqə" pyeslərində oynayacaqlar. Uşaqların yazdıqları bu pyeslərdə şəfqət və dözümlülük məsələlərinə, sosial-mənəvi mövzulara və psixoloji problemlərə toxunulur.
Sonra bu pyeslər peşəkar aktyor və rejissorlara veriləcəkdir.
Layihənin iştirakçıları iyulun 14-dən rus dramaturqları Vadim Leonov,Vyaçeslav Durnenko, Britaniya dramaturqları Alan Cefri və Cemim Leviksin rəhbərliyi altında yay düşərgəsində dincəlirlər.
İyulun 27-də ilk tamaşada gənc dramaturqların bütün əsərləri təqdim ediləcəkdir. Uşaqlar diplomlarla mükafatlandırılacaq, onlara "Klass Mira Rossiya - 2007" pyeslər toplusunu bağışlayacaqlar.

Azərbaycan.-2007.-27 iyul.-S.5.