Tiflis Azərbaycan Dram Teatrının binası bərbad hala düşüb

Tiflis Azərbaycan Dram Teatrının yerləşdiyi bina yararsız vəziyyətdədir. APA-nın Gürcüstan bürosunun məlumatına görə, prezident Mixail Saakaşvilinin 11 iyun 2004-cü il tarixli sərəncamı ilə Tiflis Azərbaycan Dram Teatrına verilən binanın damında və otaqlarında ağaclar boy atmağa başlayıb. Teatr rəhbərliyi maliyyə çatışmazlığı səbəbindən binanın əsaslı təmirinin mümkün olmadığını bildirir: "Büdcə əsaslı təmirə imkan vermir. Biz yalnız tamaşa zalının təmirinə başlamışıq ki, bunun üçün də vəsait tamaşalardan əldə olunan gəlir və daxili büdcə hesabına formalaşır. Amma bu vəsait də zalın təmirinə bəs etməyəcək". Gürcüstanın dövlət büdcəsindən Tiflis Azərbaycan Dram Teatrının fəaliyyəti üçün hər il 57.600 dollar (95 min lari) vəsait ayrılır. Bu vəsaitin 60 faizi teatrda çalışanların əməkhaqlarının ödənməsinə, 40 faizi isə kommunal xərclər üçün sərf olunur. Teatr binasının ümumi sahəsi 3.800 kvadratmetr olsa da, teatr bu sahənin yalnız 20 faizindən istifadə edir. Prezident Saakaşvilinin sərəncamına əsasən bina bütünlüklə Tiflis Azərbaycan Dram Teatrına verilib, lakin hazırda həmin binada 16 ailə məskunlaşıb, iki mağaza və bir restoran fəaliyyət göstərir. Tiflis Azərbaycan Dram Teatrında 2007-ci ildə cəmi 4 tamaşa nümayiş etdirilib. Tamaşaların nümayişi üçün teatrın rəhbərliyi məcbur olaraq başqa teatrların zallarını kirayələyir. Rəhbərlik Azərbaycan hökumətinin Tiflis Azərbaycan Dram Teatrına biganə münasibətindən narazıdır: "Bizim teatrın kənardan heç bir maddi dəstəyi yoxdur. Ermənistan hökuməti Tiflisdə yerləşən erməni teatrına Gürcüstan hökumətinin ayırdığı qədər vəsait xərcləyir. Rusiya hökuməti isə Rus Dram Teatrını əsaslı təmir etdirib. Bizim teatrın otaqlarında isə ağac bitir".

525-ci qəzet.- 2007.- 6 iyul.- S. 7.