Berlində "Türk-Avropa Mədəniyyəti Günü"

Berlində ənənəvi "Türk-Avropa Mədəniyyəti Günü" şənliyinə start verilib. Berlin Senatının rəsmi məlumatına görə, Türk Camaatı Cəmiyyətinin "Biz Berlində görüşürük" devizi altında keçirdiyi 6-cı izdihamlı dostluq şənliyində Berlindən 120 min, Almaniyanın digər bölgələrindən 200 min, Avropanın başqa ölkələrindən 500 minədək türk və türkdilli xalqların nümayəndələri iştirak edib. Azərbaycan diaspor təşkilatlarının nümayəndələri, Azərbaycan-Türk Dostluq və Əməkdaşlıq cəmiyyətlərinin fəalları da şənlik mərasimlərinə qatılıblar. Tədbirdə məqsəd Almaniyada yaşayan iki milyona qədər türk ilə alman xalqı arasında qarşılıqlı etibar və inama söykənərək, dostluq şəraitində birgə yaşayışa, tolerantlığın daha da inkişafına yeni töhfələr verməkdir. Mərasimlər iyunun 30-da paytaxtın Anhalter Bahnfof meydanında başlanıb. İştirakçılar "17 İyun küçəsi" boyu Paris Meydanı və Brandenburq qapıları istiqamətində yürüş keçiriblər. Burada türk xalqlarının folkloru, milli musiqisi, rəqsteri nümayiş etdirilib, zəngin türk mətbəxindən ibarət süfrə açılıb. Şənlik mərasimləri dünən başa çatıb.

Palitra.- 2007.- 3 iyul.- S. 15.