Qasımov H.

Gəncədəki Naftalan Sağlamlıq Mərkəzi dünya orbitinə çıxır

Gəncə şəhəri, Nizami küçəsi, 72. İndi bu ünvana pənah gətirənlər təkcə Gəncədən, respublikamızın digər şəhər və rayonlarından deyil, bir çox xarici ölkələrdən də var. Mərkəzin çox qısa vaxt ərzində şöhrət tapması təkcə Gəncənin əlverişli mövqedə yerləşməsi deyil. Hələ keçən il oktyabrın 16-da mərkəzin açılışı günü bura gələn hər bir kəs gördü ki, mərkəzdə xidmət üçün Avropa standartlarına uyğun şərait var. Təbii ki, təkcə Naftalan vannası qəbul etməklə iş bitmir. Kim sağlam olmaq istəyirsə, ona kompleks müalicə lazımdır və burada yaradılan hər bir şərait müalicənin səmərəli keçməsinə şərait yaradır.
Mərkəz şəhərin mərkəzində, xan çinar, şam və sərv ağacları ilə əhatə olunmuş qədim bir binada yerləşir. Əslində, bina və ona bitişik ərazi tamamilə yenidən qurulmuşdur. Adamların müalicəsi, istirahəti üçün burada hər cür şərait yaradılmışdır. Mərkəzdə Naftalan vannaları ilə yanaşı, yod-brom vannaları, masaj, fizioterapiya, müasir laboratoriyalar fəaliyyət göstərir. İşçilərə pulsuz yemək verilir. Yeri gəlmişkən qeyd edək ki, vannadan çıxan hər bir xəstəyə də pulsuz çay verilir. Gözəl və yaraşıqlı yeməkxana — bufetdə yüksək xidmət göstərilir.
Mərkəzdə təcrübəli, şəhərdə ad-san çıxarmış həkimlər, tibb bacıları çalışırlar. İndiyədək buranın xidmətindən 800 nəfərdən çox adam istifadə etmişdir. Hələ ki, narazı qalan, şəfa tapmayan xəstə yoxdur. Hamı kollektivin işindən, göstərilən xidmətdən, buradakı şəraitdən razılıq edir. Maraqlıdır ki, sonsuzluqla bağlı müraciət edən xəstələrin 46-da müsbət nəticə əldə olunmuşdur. Onların arasında xarici ölkələrin vətəndaşları da var. Yaponiya, Türkiyə, Rusiya, Ukrayna və digər ölkələrdən müalicəyə gələnlər buraya bir daha gəlmək arzusundadırlar. Mərkəzdə quraşdırılmış müasir istilik sistemi imkan verir ki, burada ilboyu xidmət göstərmək mümkün olsun.
Gəncə Naftalan Sağlamlıq Mərkəzinə 26 il Naftalan Kurort Birliyi sistemində çalışan təcrübəli həkim Şahin Babayev başçılıq edir. Ş.Babayev söhbət zamanı dedi ki, tezliklə mərkəz hər yerdə şöhrət qazanacaq. Çünki burada müalicə və istirahət üçün şərait var. Həkimlərin ixtiyarında dünya standartlarına cavab verən tibbi avadanlıqlar var. Qan analizlərinin aparılması üçün yaradılmış laboratoriyanın şəhərdə analoqu yoxdur.
Məlumat üçün qeyd edək ki, Naftalan neftinin müalicəvi əhəmiyyəti haqqında ilk yazılı məlumat Nizami Gəncəvinin əsərlərində var. XIX əsrin sonlarında Avropa və Amerikada, Asiyada bu neftin möcüzəsi haqqında məlumatlar geniş yayılmağa başlanıb. Sovetlər Birliyi vaxtı hər il Naftalan şəhərində azı 100 min adam müalicə olunurdu və onların əksəriyyəti öz əl ağaclarını məşhur “Çəliklər muzeyi”ndə qoyub gedirdi.
Hazırda Gəncədəki mərkəzdə sümük, oynaq və əzələ sistemi xəstəlikləri, yəni revmatizm, revmatik poliartrit, artrit və s. periferik sinir sistemi xəstələrikləri, yəni osteoxondroz, nevritlər, nevralgiyalar, dəri xəstəlikləri, yəni psoriaz, ekzema, dəmrov, qaşınma, qadın xəstəlikləri, uroloji, kişi və qadın sonsuzluğu, mədə-bağırsaq xəstəlikləri və digər yüzlərlə xəstəlik müalicə olunur.
Burada ümumi Naftalan vannaları ilə yanaşı, oturaq, yod-brom vannaları, ağ naftalan, işıq vannaları, masaj, fizioterapiya və s. müalicə üsulları uğurla tətbiq olunur.
Gəncə Naftalan Sağlamlıq Mərkəzinə gəlsəniz peşman olmazsınız.

Xalq qəzeti.- 2007.- 1 iyul.- S. 4.