Nəzakət

"İki dənizin əfsanələri" mədəni turizm marşrutu yaradılacaq

Qara Dəniz İqtisadi Əməkdaşlıq Təşkilatının üzv dövlətlərinin Mədəniyyət Nazirlərinin ilk iclası keçirilib

Azərbaycan Mədəniyyət və Turizm Nazirliyinin mətbuat xidmətindən "Səs"ə verilən məlumata əsasən, iyulun 4-də Yunanıstanda Qara Dəniz İqtisadi Əməkdaşlıq Təşkilatının üzv dövlətlərinin mədəniyyət nazirlərinin ilk iclası keçirilmişdir. Nazirlər görüşündən əvvəl 2-3 iyul 2007-ci il tarixlərində QDİƏT-in mədəniyyət üzrə işçi qrupunun ilk iclası keçirilmişdir.

Qara Dəniz İqtisadi Əməkdaşlıq Təşkilatının üzv dövlətlərinin mədəniyyət nazirlərinin ilk iclasında Mədəniyyət və Turizm nazirinin müavini Ədalət Vəliyevin rəhbərliyi ilə nümayəndə heyəti, 2-3 iyul 2007-ci il tarixlərində QDİƏT-in mədəniyyət üzrə işçi qrupunun iclasında nazirliyin beynəlxalq təşkilatlarla əməkdaşlıq və proqramlar sektorunun məsləhətçisi Vasif Eyvazzadə iştirak etmişdir.

Qeyd olunan iclaslarda müasir mədəniyyət sahəsində əməkdaşlıq şəbəkələri, mədəniyyət marşrutları, mədəniyyətlərarası dialoq, mədəniyyətin iqtisadiyyatı və Qara dəniz regionunda mədəni proseslər, eyni zamanda, müasir inteqrasiya proseslərinə mədəniyyətin təsir imkanları barəsində müzakirələr aparılmış və nazirlər iclasında Sunion Bəyannaməsi və ikiillik fəaliyyət planı qəbul olunmuşdur.

Nazirlər iclasında çıxış edən Mədəniyyət və Turizm nazirinin müavini Ədalət Vəliyev QDİƏT çərçivəsində mədəniyyət sahəsində əməkdaşlığın çox mühüm hadisə olduğunu, regional çoxtərəfli əməkdaşlıq münasibətlərinin inkişafına böyük töhfə verəcəyini və region xalqlarının mədəni bağlılığını daha da artıracağını bildirmişdir. Bununla yanaşı, nazir müavini Ermənistan tərəfindən Azərbaycan ərazilərinin 20%-nin işğal olunmasının həmin ərazidə yaşayan insanlar mədəni hüquqlarının pozulmasına və yüzlərlə Azərbaycan mədəniyyət abidələrinin dağıdılmasına səbəb olduğunu iştirakçıların diqqətinə çatdırmış və beynəlxalq birlik tərəfindən təcavüzkarın ifşa olunmasına çağırmışdır. Eyni zamanda, Ədalət Vəliyev Azərbaycanın milli mədəniyyət siyasətinin prioritetləri və bu sahədə əldə olunmuş uğurları barədə məlumat vermiş və Qara dənizlə Xəzər dənizi arasında mədəniyyət körpüsü yaratmaq məqsədilə "İki dənizin əfsanələri" mədəni turizm marşrutunu təklif etmişdir. Bu təklif iştirakçılar tərəfindən yüksək qiymətləndirilmişdir.

Qeyd olunan məsələlər ətrafında təşkilatın mədəniyyət üzrə işçi qruplarının iclasında Vasif Eyvazzadə də çıxış etmiş və işçi qrupun üzvlərini daha da fəal əməkdaşlığa çağırmışdır.

Məlumat üçün bildiririk ki, QDİƏT-in mədəniyyət üzrə işçi qrupu 2006-cı il 1 noyabr tarixində QDİƏT-ə üzv ölkələrin Xarici İşlər Nazirləri Şurasının Moskvada keçirilmiş 15-ci iclasının qətnaməsi əsasında yaradılmışdır. Yunanıstan Respublikası iki il müddətində QDİƏT-in mədəniyyət üzrə işçi qrupunun əlaqələndirici ölkə olacaqdır.

Səs.- 2007.- 5 iyul.- S. 12.