Bağır R.
Bu
günlər V.Səmədova adına sərgi salonunda gənc
rəssam Elnur Rəsulovun rəngkarlıq, qrafika
əsərlərindən ibarət sərgisi nümyiş
etdirilir. Hərarətli düyğular və əlvan boyalarla
zəngin olan rəsmləri seyr edənlər rənglər
aləminin cazibəsinə düşür,
heyranlığını gizlədə bilmir. Kətan
üzərində dil açıb danışan
görüntülər həssas rəssam qəlbinin
döyüntüləri, gənc sənətkar
təfəkkürünün bədii məhsuludur.
Elnur Rəsulov Vətənin füsunkar təbiətini,
yurddaşların psixoloji durumunu kətana
köçürərkən övlad borcunu
ödəməyə çalışır. Öz təmiz
hisslərini, mənalı düşüncələrini adi
rənglərin minlərlə çaları ilə ifadə
edir. Sərgidə ən çox nəzəri cəlb edən
fədakar, namuslu Azərbaycan qızlarının
səciyyəvi gözəlliyi, münis
baxışlarıdır. “Lənkəranlı qız”,
“Nigar”, “Nərminə”, “Kəbirə”, “Dünya” və
digər portretlərdəki simalarla üz-üzə
dayanmaqdan, onların bir-birinə bənzəməyən
dupduru gözlərinə baxmaqdan yorulmursan.
Bu ecazkar tablolara tamaşa edərkən xəyal
zirvələrinə ucalır, təfəkkürün
dərin qatlarına baş vurur, gözəlliyin
çəkisizliyində üzürsən. Rəssamın
kətan üzərində
düsturlaşdırdığı hikmət və
əsrarəngizliyi başa düşmək özü də
hünər istəyir — rənglər aləmini bir
baxışda anlamaq mümkün deyil. Onu yalnız duya-duya,
sevə-sevə gözünə, ürəyinə hopdurub
cismən anlaya bilirsən. “Bar” əsərində narla dolu
səbətlər elə təsvir edilib ki, onu dərən,
qablaşdıran, sonra oturub dincələn ər və
arvadın yanaqları nar ilə simmetriya yaradır. Onların
üzündə yorğunluq deyil, sabaha ümid
görünür. Zəhmətin bəhrəsi elə nar
qədər şirindir.
Elnur təxəyyülünü həyatla bağlamaq
üçün istinad axtarır, fırçanı
kətanın hansı nöqtəsinə qoyursa, o
nöqtəni tapmış olur. “Yuxu” əsərində
körpəsini yatırtmaq istəyən gənc ananın
özünün körpə ətrindən məst olub
yatması, uşağın da uyuması
tamaşaçının qəlbini riqqətə gətirir.
Rəssamın seçdiyi rənglər mənzərəni
romantikləşdirir.
Gənc rəssam qırmızı rənglərdən
yetərincə istifadə edir. Bu rəngin öz estetik
çalarları var: bayraq, qan, yanaq, don... “Şəhidlər
bulağı” əsərindəki qırmızı
şəhid qanının rəmzi çalarıdır. Bulaq
başında bir dəstə qız-gəlininin
baş-başa verib dərdləşməsi şəhid
anasının, bacısının yaralı ürəyinin
üzə çıxan rəngidir. Bu göynərtinin məhz
“Şəhidlər bulağı”nda verilməsi daha
qabarıqdır. Azərbaycan qadınları
balacanlıdır, qardaşcanlıdır,
ərcanlıdır... Canlarından qopub əbədiyyətə
qovuşan əzizlərinin xatirəsi onların intizar
qəlbində unudulmayan kədər, sonsuz öyüncdür.
Azərbaycanın təbiəti başdan-başa
əsrarəngiz mənzərədir. İllah da dağlar,
çaylar, ormanlar... “Fındıqlıq”, “Eldar şamı”,
“Çay”, “Ağcaqayınlar” kimi tablolar təbii sənət
əsərləridir. Elnurun rəsmləri uydurma deyil,
həyatın bir parçasıdır. “Xalça yuyanlar”
əsərində yaraşıqlı bir xanım, sanki,
özünü unudub, zərif ilmələrdən
yaranmış, təkrarsız sənət əsərinin
sehrinə dalıb.
Rəssamın akvarel, pastel, kömür və karandaşla
yaratdığı əsərlərin
məziyyətlərindən çox danışmaq olar.
Əsası odur ki, boya ilə o, rəssamlıq
sənətinin daha dərin qatlarına baş vura bilir. Elnur
Rəsulov gəncdir, bu, onun ilk sərgisidir. Qarşıda onu
daha böyük yaradıcılıq uğurları
gözləyir.
Xalq qazeti.-2007.-5 iyul.-S.7.