Böyük Britaniyada çıxan Halı jurnalında Azərbaycan xalça sənətinə geniş yer ayrılmışdır

Böyük Britaniyada nəşr olunan “Halı” jurnalının builki 2-ci nömrəsində “Azər ilmə” Məhdud Məsuliyyətli Cəmiyyətinə həsr olunmuş qoşa səhifəlik material verilmişdir.
Jurnalda dövlət bayrağımızın əksi ilə yanaşı, Qarabağda toxunmuş məşhur “Çələbi” xalısının da rəngli fotosurəti, eləcə də müəssisənin bütün dünyada xalça sənətinin tanınmış bilicisi və taciri kimi təqdim edilən baş direktoru Vidadi Muradovla müsahibə dərc olunmuşdur. jurnalın təqdimatında bildirilir ki, “Azər ilmə” fəaliyyətə 1996-cı ildə başlayıb. Nadir xalı kompozisiyalarının dirçəldilməsi ilə yanaşı, şirkət bədii ənənələrin inkişafı, xalça istehsalı və ixracı sahəsində də böyük iş aparır. “Azər ilmə”nin yun və ipəkdən istehsal olunan, işləmələrin incəliyi, ilmələrin yüksək sıxlığı, tərtibatın orijinallığı, milli koloriti ilə seçilən xalçaları beynəlxalq standartlara tam cavab verir. Məhz bu səbəbdən mərkəzi qərargahı Oksfordda yerləşən Avropa Biznes Assambleyası bu il ən yüksək “Kraliça Viktoriya adına mükafat”ını keyfiyyətli məhsul istehsalı ilə qitə bazarlarında layiqli yer tutan, Azərbaycan xalçasının tarixi şöhrətini böyük uğurla yaşadan “Azər ilmə” MMC-yə vermişdir.
Qeyd edilmişdir ki, Bakının qədim zamanlardan xalçaçılığın mərkəzi kimi tanınan Nardaran, Binə, Hökməli, Lökbatan qəsəbələrində, həmçinin Kürdəmir və Lerik rayonlarında şirkətin toxuculuq emalatxanaları fəaliyyət göstərir.
“Azər ilmə”də 350 nəfər çalışır. Onların sırasında rəssamlar, sənətşünaslar, toxucular və digər mütəxəssislər vardır. Şirkətin mütəxəssisləri unudulmuş xalça kompozisiyalarından istifadə etməklə yüksək keyfiyyətli xalçalar hazırlayır, nümunələri dünyanın bir çox muzeylərini və şəxsi kolleksiyalarını bəzəyən Azərbaycan xalçaçılıq sənətinin ənənələrini dirçəltmək üçün böyük səy göstərirlər. İpləri boyamaq üçün ancaq təbii boyalardan istifadə edilir, eskizlər yalnız milli naxış və çeşnilərdən götürülür. Xalça toxunuşunda istifadə olunan bütün xammal yerli məhsullardır.
“Azər ilmə”nin məqsədi Azərbaycan xalçaçılıq sənətinin ənənələrini yaşatmaq və inkişaf etdirməkdir. Şirkətin mütəxəssisləri tərəfindən bu günədək minədək xalça eskizi işlənmişdir.
MMC-nin nəzdində Azərbaycan xalça muzeyi yaradılmışdır. “Azər ilmə” markası ilə Azərbaycan xalçaları ABŞ, Almaniya, Avstriya, İngiltərə, İtaliya, Yaponiya, Rusiyada keçirilən satış sərgilərində xüsusi mükafat və sertifikatlara layiq görülmüş, milli xalçaçılıq ənənələrinin davam etdirilməsi üzrə aparılan işlərin yüksək səviyyəsi ilə böyük nüfuz qazanmışdır. Müəssisənin rəhbəri isə bu gün dünyanın bir çox muzey və satış sərgilərində erməni xalıları kimi təqdim edilən xalçaların əksəriyyətinin məhz Azərbaycan xalqına mənsub olduğunu təkzibedilməz faktlarla diqqətə çatdırmışdır

Xalq qəzeti.-2007.-15 iyul.-S.6.