Arxeoloqlar Abşeron yarımadasında yeni qəbirüstü abidələr tapıblar

Bakı-Tbilisi-Ceyhan (BTC) əsas ixrac neft boru kəmərinin tikintisi ilə əlaqədar olaraq aparılan qazıntı işlərinin 2002-2005-ci illər üzrə hesabatı yazılır. Bu barədə AMEA-nın Arxeologiya və Etnoqrafiya İnstitutunun direktor müavini Nəcəf Müseyibli məlumat verib. Onun sözlərinə görə, boru kəmərinin çəkilişində institutun 30-a yaxın əməkdaşı iştirak edib.

Bütün qazıntı işləri isə 4 arxeoloqun müşahidəsi ilə həyata keçirilib. Qazıntılar zamanı məqsədyönlü şəkildə heç bir abidənin məhv edilmədiyini deyən N.Müseyibli qeyd edib ki, 41 saatlıq arxeoloji qazıntılar zamanı 20 mindən artıq tarixi abidə üzə çıxarılıb: "Ümumilikdə isə BTC-nin çəkilişi zamanı aparılan qazıntı işləri Azərbaycan arxeologiyası tarixində ən böyük hadisə sayılır. Miqyasına və üzə çıxarılan abidələrin növ müxtəlifliyinə, sayına görə bu qazıntı işləri yalnız Mingəçevir arxeoloji ekspedisiyasının nəticələri ilə müqayisə olunur".

Qeyd edək ki, "Mingəçevir arxeoloji ekspedisiyası-60" elmi məcmuəsi bu günlərdə Mingəçevirdə işıq üzü görüb. Su anbarının tikintisi zamanı yaradılan ekspedisiyanın 60 illiyi ötən ilin noyabrında Mingəçevir Şəhər İcra Hakimiyyəti tərəfindən qeyd olunub, ekspedisiyanın yekunları elmi konfransda müzakirə edilib. İşıq üzü görən 216 səhifəlik "Mingəçevir arxeoloji ekspedisiyası-60" elmi məcmuəsində tapılan arxeoloji materialların elmi təhlili aparılıb, eləcə də 2006-cı ildə ölkə üzrə aparılan ekspedisiyaların elmi yekunu tezislər nəticəsində öz əksini tapıb.

Yeri gəlmişkən, tarix elmləri namizədi İdris Əliyevin Abşeron yarımadasında apardığı tədqiqatlar da öz bəhrəsini verib. Arxeoloqlar qazıntılar zamanı eramızdan əvvəl I minilliyə aid olan qiymətli qəbirüstü abidələrin bir neçəsini bu günlərdə üzə çıxarıblar.

Səs.- 2007.- 28 mart.- S. 16.