Azərbaycan Berlində keçirilən 41-ci Beynəlxalq turizm sərgisində yüksək səviyyədə təmsil olunmuşdur

Martın 7-də Almaniyanın paytaxtı Berlində 41-ci Beynəlxalq turizm sərgisi açılmışdır. Almaniya İqtisadiyyat Nazirliyinin və Berlin Beynəlxalq Turizm Birjasının (İTB) dəstəyi ilə Dünya Turizm Təşkilatının təşkil etdiyi bu qlobal sərgidə 184 ölkədən 11 mindən artıq özəl və dövlət turizm qurumları təmsil olunmuşdur.
Ənənəyə uyğun olaraq, Berlin beynəlxalq turizm sərgisində hər il dünya ölkələrindən biri fəxri qonaq statusu ilə iştirak edir. Builki sərginin fəxri tərəfdaş qonağı və mədəni proqramının təşkilatçısı Hindistandır.
Almaniyanın federal iqtisadiyyat naziri Mixael Qlos 41-ci Beynəlxalq sərgini açıq elan etmişdir. 160 min kvadratmetr sahəni əhatə edən sərginin 26 nəhəng pavilyonunda hər iştirakçı ölkənin ayrıca bölməsi vardır. Azərbaycanın bölməsi Avropa pavilyonunda yerləşir.
Azərbaycanın Mədəniyyət və Turizm Nazirliyinin bilavasitə rəhbərliyi, "İmproteks-Travel", "Elita-Travel", "Vahid-S" şirkətləri və qurumlarının iştirakı ilə Bakının Qoşaqala qapısı və Atəşgah tarixi memarlıq abidələri maketlərinin dekorasiyası çərçivəsində qurulmuş, girəcəyində ingilis və alman dillərində "Azərbaycana xoş gəlmisiniz!" sözləri yazılmış, qarşısında Azərbaycan Respublikasının dövlət bayrağı qaldırılmış bölməmiz diqqəti dərhal çəkir.
Xatırladaq ki, respublikamızın turizm imkanları və potensialını əks etdirən reklam və çap materiallarının 80 faizi alman dilində təqdim olunur. Sərginin ilk günü turizm və səyahət həvəskarı olan yüzlərlə tamaşaçı Azərbaycanın ekspozisiyası ilə yaxından tanış olmuşdur.
Sərgi martın 11-də başa çatacaqdır.

Azərbaycan.- 2007.- 8mart.- S. 6..