Xəlilzadə F.
Bu ilin fevralında
ölkə başçısı cənab İlham Əliyev
2007-ci ilin "Gənclər ili" elan edilməsi haqqında
sərəncam imzalayıb. Bu sərəncamla bağlı
əlaqədar təşkilatların keçirəcəyi
tədbirlər sırasında gənc istedadlara da
qayğı və diqqət nəzərdə tutulub. Bu da
səbəbsiz deyil. Hər bir gənc bizim işıqlı
sabahımız deməkdir.
Kiçik qəhrəmanımızın 10 yaşı var.
Amma yaşının azlığına baxmayaraq, istedadı
sayəsində azman sənətkarlarla bir sırada dayanmaq
gücünə malikdir. Əli fırça tutandan
rənglərlə işləməyi sevən,
ürəyindən keçənləri, ən başlıcası,
heyrətini müxtəlif naxışların dili ilə
ifadə edən Bəhram Yaradanquliyev Bakı
şəhərində anadan olub. 3 yaşından
müxtəlif rəsmlər çəkməyi bacaran bu balaca
rəssam XXI əsr "İstedad" məktəbində
təhsil alır. Məşhur rəssam İnna Konstinanın
rəhbərliyi altında "7 əlvan
kəpənək" adlı studiyada sevdiyi sənətlə
müntəzəm məşğul olur. Onun ilk
qələbəsi 2 il bundan əvvəl olub. 8 yaşlı Bəhram
respublika Rəssamlar İttifaqı və Dövlət Teleradio
Şirkəti tərəfindən Türkiyə səfirliyinin
köməyi ilə keçirilən "Elimizə yaz
gəlib" adlı müsabiqədə öz
yaşıdlarına qalib gəlmişdir. İlk fərdi
sərgisi isə 6 yaşında olarkən oxuduğu
məktəbin qalereyasında keçirilmişdir.
Bəhramın rənglər dünyası olduqca
maraqlıdır. Xüsusilə də Avropa
rəssamlarının yaradıcılığına meyli daha
güclüdür. Bu istək onun bir sıra
portretlərində, eləcə də karandaşla
işlədiyi cizgilərdə öz əksini tapıb. Hiss
olunur ki, Bəhram istənilən rəsm əsərinin,
portretin üzünü bacarıqla köçürə
bilir. Əlbəttə, onun təbii naturadan kətan və
kağız üzərinə işlədiyi orijinal
əsərlər də var. "Tutuquşu", "Yay",
"Mənim anam", "Natürmort", "Novruz
bayramı", "Anamın ad günü", "Mən
və şəhərim Bakı" və başqa
əsərləri maraqla baxılır. Hiss olunur ki,
Bəhramın həyata, onun gözəlliklərinə öz
münasibəti var.
Balaca rəssamın əsərləri həmişə
diqqət mərkəzindədir. O, bir sıra
müsabiqələrdə uğurla iştirak edir. "Yaponiya
Günəş doğan ölkədir" adlı uşaq
müsabiqəsində (2005) Bəhram yenə də qalib
gəlmişdir. Onun ikinci fərdi sərgisi 2005-ci ilin dekabr ayında
"Abşeron-Art" qalereyasında keçirilmişdir.
Burada gənc istedadın 40-dan artıq işi nümayiş
etdirilmişdir. O, tutqun sulu boya, pastel, karandaşla
işləməyi daha çox sevir. 2006-cı ilin
yanvarında "Space" telekanalı tərəfindən
Bəhram Yaradanquliyevin üçüncü sərgisi
tamaşaçılara təqdim edildi. Burada gənc
rəssamın 60 əsəri nümayiş olunurdu. 2006-cı
ilin mart ayında keçirilən "Elimizə yaz
gəlib" adlı müsabiqədə Bəhram yenidən
uğur qazanmışdır. Demək olar ki, Bəhram
bütün müsabiqələrdə iştirak edir,
həmişə də uğur qazanır. Öz
yaşıdları arasında Bəhramın uduzduğu
müsabiqə olmayıb. Onun işlərindən ibarət
kataloqlar işıq üzü görüb.
Bəhruz Kəngərli, Səttar Bəhlulzadə, Mikayıl
Abdullayev, Tahir SalahovE kimi məşhur rəssamların
məharətlə saldığı böyük yola yeni bir
kövrək cığır da qovuşmaqdadır. Bu
cığırda öz inamlı addımlarını atan 10
yaşlı rəssamın gələcəkdə həqiqətən
bu möhtəşəm sırada ləyaqətlə yer
tutması inandırıcıdır. Çünki Bəhram
yaşından çox irəli gedərək
məsuliyyətlə işləməyi, reallıqları
öz duyğularından, idrakından keçirərək
kətan üzərində maraqlı, baxımlı, orijinal
əks etdirməyi bacarır. Bu yolda ona uğurlar
arzulayırıq. 2007-ci il Gənclər ilidir. Yəqin ki, bu
möhtəşəm ilə də Bəhramın öz
töhfələri olacaqdır.
Azərbaycan.- 2007.- 16 mart.- S. 8.