Otuz
il əvvəl "Ögey ana" bədii filmində İsmayıl rolunun ifaçısı, sonra Qarabağ uğrunda döyüşləri, zülümləri,
zillətləri "Fəryad"
filmində canlandıran
aktyor-rejissor Ceyhun Mirzəyevlə "Azərbaycanfilm"
kinostudiyasının önündə
söhbətləşirdik. Bu zaman bir
nəfər yaxınlaşıb
onun halını, vəziyyətini soruşdu.
Xoş cavabdan məmnun qalıb bizdən ayrıldı. Ceyhun dedi ki, o,
30-dan artıq bədii
filmə tərtibat vermiş, əsərləri
dünyanın əksər
ölkələrinin sərgi
salonlarında uğurla
nümayiş olunan xalq rəssamı, Dövlət mükafatı
laureatı Elbəy Rzaquliyevdir.
Həmin gün kino sənətimizin inkişafında unudulmaz xidmətləri olan Ceyhundan eşitdiklərim hələ də yadımda qalıb: "Tale üzümə qapı açdı. Məni dəvət etdilər "Ögey ana"da İsmayıl
roluna çəkilməyə.
Bəzən çəkilişlərə
gəlmirdim, kamera qarşısından qaçırdım.
Obrazın qrimini, geyimini bəyənmirdim. Belə vaxtlarda Elbəy müəllim mənə məsləhət,
nəsihət verərdi.
Bir gün rejissordan, operatordan xəlvət İsmayılın
kostyumunu, papağını
dəyişdim. Quruluşçu
rəssam Elbəy müəllim mənə yaxınlaşıb: "Axı
belə olmaz. Sən əsərin mənasını, mövzusunu
dəyişirsən", - dedi. Onun müraciəti
o qədər doğma, səmimi idi ki, bir
də belə hərəkət etmədim".
E.Rzaquliyev 80 il əvvəl Bakı şəhərində ziyalı
ailəsində dünyaya
göz açıb. Orta məktəbi uğurla başa vurub, incəsənət texnikumuna daxil olub. Mikayıl Abdullayevdən, Böyükağa
Mirzəzadədən dərs
alıb. Sevdiyi, ürəyindən keçən
mövzunu kağız,
kətan üzərində
elə ifadəli işləyərmiş ki,
baxanlar valeh olarmış. İkinci dünya müharibəsindən
sonra Ümumittifaq Kinematoqrafiya İnstitutunda
təhsilini davam etdirib. O zamandan
çox illər keçməsinə baxmayaraq,
bu gün də fəxr edir ki, tələbəlik
dövründə Üzeyir
bəyi, Səməd Vurğunu tanıyıb, Tofiq Tağızadə, Ağadadaş Qurbanov, Ağasadıq Gəraybəyli,
Leyla Bədirbəyli,
Nəcibə Məlikova
ilə birgə işləyib. Qürur
hissi duyur ki, "Arşın mal alan", "Telefonçu qız",
"Möcüzələr adası", "İstintaq
davam edir", "Tütək səsi",
"Sevil" və başqa filmlərə bədii tərtibat verib.
Xalq rəssamı, prezident təqaüdçüsü
Rafiq Mehdiyev deyir:
- Elbəyi çoxdan
tanıyıram. Olduqca
zəhmətsevər, milli
ənənəyə, adətə
sadiq insandır. Onun tərtibat verdiyi bədii filmlərdə, əsərlərində
milli kolorit aşkar hiss olunur. O, Rəssamlar İttifaqına üzvlüyə
qəbul olunmaları üçün neçə-neçə gənc həmkarına zəmanət
verib. Mənzillə, fərdi emalatxana ilə təmin olunmalarına qayğı
göstərib. Uzun illərdir ki, Elbəy yaradıcılığı
ilə tamaşaçıları
sevindirir. Əl işlərinin adlarına
nəzər yetirmək
kifayətdir ki, onun təfəkkür dairəsinin necə geniş olduğunu biləsən. "Qələbə bayramı"
mövzusunda tabloları,
Bakı və Abşeron mənzərələri
fırça ustasının
maraqla baxılan əsərləri sırasındadır.
"Ərəb silsiləsi",
"Meksikaya səyahət",
"Hindistan abidələri"
əsərləri, "Yaponiya",
"ABŞ", "Rumıniya" qravürləri müxtəlif
şəkil qalereyalarında
uğurla nümayiş
etdirilib.
Sənətkarın bu
günlərdə S.Bəhlulzadə
adına sərgi salonunda ömrünün
80 illiyinə həsr olunmuş fərdi sərgisini tamaşaçılar
ədəbi hadisə
kimi qarşıladılar.
"Azercell Telecom"
birgə müəssisəsinin
təşkilatçılığı ilə keçirilən həmin tədbirdə qonaqlar rəssamın zəngin yaradıcılığı
ilə bir daha tanış oldular. "Azercell"in baş müdiri
A.Halim Atəş aldığı xoş təəssüratı, ürək
sözlərini bildirdi:
"Azərbaycanın çox
zəngin mədəniyyəti
var. Zaman-zaman bu diyar fitri
istedadlar yetişdirib.
Onlar Azərbaycan mədəniyyətinə misilsiz
töhfələr veriblər.
Elbəy Rzaquliyev kimi sənətkarlar Azərbaycan üçün
çox önəmli
dəyərlərdirE"
Rəssamın çoxillik
dostu, tanınan qələm sahibi Azad Şərifin xatirəsindən:
- Elbəy Rzaquliyevin fərdi sərgiləri arasında ən böyüyü 1989-cu ilin
oktyabrında Moskvada oldu. Həmin vaxt ulu öndər
Heydər Əliyevin sərgiyə gəlməsi
rəssamı həddən
artıq məmnun etdi. Eksponatlarla tanış olan ulu öndər Elbəyə yeni-yeni uğurlar arzuladı. O, həmişə azad yaradıcılığa üstünlük
verib. Son illər rəssam bir-birindən gözəl natürmortlar,
təbiət təsvirləri
çəkir. Elbəy
Rzaquliyev doğma xalqımıza şərəf
gətirən fırça
ustasıdır, göz
açdığı, boya-başa
çatdığı İçərişəhərə
ürəkdən, qəlbən
vurğundur.
Səmimi insan, görkəmli fırça
ustasının yenə
də gənclik həvəsi ilə molbert önündə dayanmasını, baxımlı,
yaddaqalımlı əsərlər
yaratmasını arzulayırıq.
Azərbaycan.- 2007.- 21 mart.- S. 8.