Parisdə azərbaycanlı rəssamın kitabının təqdimatı keçirilmişdir

Martın 7-də Parisdə Fransanın keçmiş prezidenti Jorj Pompidu adına Mərkəzdə tanınmış rəssam Altay Sadıqzadənin rəsm əsərlərinin reproduksiyalarından ibarət kitabın təqdimat mərasimi keçirilmişdir. Rəssamın müxtəlif illərdə çəkdiyi yüzlərlə portret, peyzaj və abstrakt əsərləri kitabda öz əksini tapmışdır. Mərkəzin kitab mağazasının direktoru Oliviye Paskal bildirmişdir ki, burada ilk dəfə olaraq xarici rəssamın əsərinin təqdimat mərasimi keçirilir. A.Sadıqzadə qeyd etmişdir ki, bu yainız mənim kitabın təqdimatı deyil, eyni zamanda Azərbaycan mədəniyyətinin Fransa kimi ölkədə təbliği sahəsində növbəti addımdır. Kitabda rəngkarlıq baxımından Şərq və Qərb rəssamlığının müasir cizgiləri bir vəhdət halında birləşmişdir. Fransanın tanınmış jurnalisti Rene Milon rəssamın yaradıcılığı barədə fikrini belə izah etmişdir: "Kitabdakı reproduksiyaları nəzərdən keçirərkən məndə belə təsəvvür yarandı ki, bu rəssamın özünəməxsus seçimi vardır. Onun yaradıcılığını fərqləndirən əsas cəhət hər bir ştrixi müxtəlif boyalarla əks etdirməsidir". Təqdimat mərasimində Fransa Xarici İşlər Nazirliyinin, Paris Bələdiyyəsinin və ictimaiyyətin nümayəndələri, ölkədə-akkreditə olunmuş bir çox ölkələrin səfirləri, Azərbaycanın Fransadakı səfiri Tarik Əliyev, diasporumuzun təmsilçiləri, burada çalışan və yaşayan soydaşlarımız iştirak etmişlər.

İki sahil.- 2007.- 10 mart.- S. 8.