Turanə

Çin uşaqların gözü ilə...

Mərkəzi Sərgi salonunda Mədəniyyət və Turizm Nazirliyi və Çinin ölkəmizdəki səfirliyinin təşkilatçılığı ilə rəsm sərgisi keçirilib

Səttar Bəhlulzadə adına Mərkəzi Sərgi salonunda “Çin uşaqların gözü ilə” rəsm sərgisi keçirilib. Mədəniyyət və Turizm Nazirliyi və Çin Xalq Respublikasının ölkəmizdəki səfirliyinin birgə təşkilatçılığı ilə baş tutan dünənki sərgidə respublikanın müxtəlif rəssamlıq məktəbinin 100-ə yaxın tələbəsi iştirak edirdi.

Tədbirdə giriş sözü ilə çıxış edən mədəniyyət və turizm nazirinin müavini Sevda Məmmədəliyeva sərginin mahiyyətindən söhbət açıb. O,  bildirib ki, əsas məqsəd gənc nəsli dünya xalqlarının mədəniyyəti ilə yaxından tanış etməkdən ibarətdir. S.Məmmədəliyeva onu da əlavə edib ki, nazirlik bu yöndə bir sıra layihələr həyata keçirməyi də planlaşdırır. Çin mədəniyyətinin dünya xalqları mədəniyyətinin ən qədim nümunələrindən olduğunu söyləyən nazir müavini bu səbəbdən də ilk olaraq onlara üz tutduqlarını deyib.

Çin Xalq Respublikasının ölkəmizdəki səfiri Can Siyun isə sərgidən məmnun qaldığını bildirib. “Bu ölkənin övladlarının nə dərəcədə bacarıqlı və istedadlı olduğu barədə məlumatım var idi. Azərbaycan məktəbliləri bunun əyani subutu oldular. Sərgidə nümayiş olunan əsərlərin gözəlliyi və canlılığı insanları heyrətləndirərək, ilham verir. Onların baxışları müxtəlif olduğundan hər biri Çini bir başqa gözəlliklə təsvir edib. Tablolarda Çin xalqına olan sevgi, dostluq münasibətləri əks olunub. İki ölkə arasındakı dostluq münasibətlərindən, İpək yolunun tarixindən söhbət açan səfir gələcəkdə də bu münasibətlərin qorunub saxlanılacağını vurğulayıb.

Mərkəzi Sərgi Salonu və Mədəniyyət və Turizm Nazirliyi adından səfirə qədim mədəni abidələrimizdən olan Şirvanşahlar Sarayının əksi həkk olunmuş tablo hədiyyə olunub. Sonra səfirlik tərəfindən həvəsləndirici mükafat sahiblərinə MP3 pleyer, üçüncü yer DVD pleyer, ikinci yer sahiblərinə isə rəqəmli fotoaparat və diplomlar verilib. Sərginin qalibinə isə kompyuter hədiyyə olunub.

Yeni Azərbaycan.- 2007.- 28 mart.- S. 8.