Azərbaycanın xalçaçılıq sənəti Türkiyə Baş nazirinin xanımında zəngin təəssürat yaratmışdır

Azərbaycan Prezidentinin xanımı, YUNESKO-nun və İSESCO-nun xoşməramlı səfiri, Milli Məclisin deputatı, Heydər Əliyev Fondunun prezidenti Mehriban Əliyeva və Türkiyə Baş nazirinin xanımı Əminə Ərdoğan martın 9-da "Azər-İlmə" Məhdud Məsuliyyətli Cəmiyyətinin "Azərbaycan xalçaşı qalereyası"nda olmuşlar. Hörmətli qonaqları burada səmimiyyətlə, gül-çiçəklə qarşıladılar.

Məlumat verildi ki, xalçaçılıq Azərbaycan xalqının ən qədim sənətlərindən biridir. Qədim səyyahlar, salnaməçilər ölkəmizdə toxunan xalı-xalçanın yüksək keyfiyyyəti, zəngin çeşniləri barədə yazılı məlumatlar vermiş, Şirvan, Təbriz, Qarabağ, Qazax, Gəncə, Quba xalçalarının Böyük ipək yolu üstündəki bütün ölkələrdə məşhur olduğunu bildirmişlər. Azərbaycanın xalı və xalçaları indi də dünyanın bir çox muzeylərinin ən nadir eksponatlarından sayılır. 350 nəfərin çalışdığı bu müəssisənin məhsulları ABŞ, Almaniya, Avstriya, İngiltərə, İtaliya, Yaponiya, Rusiyada keçirilən satış sərgilərində xüsusi mükafat və sertifikatlara layiq görülmüşdür. İpləri boyamaq üçün ancaq təbii rənglərdən istifadə edilir, eskizlər yalnız milli naxış və çeşnilərdən götürülür. İşlədilən bütün xammal yerli məhsullardır. Hörmətli xanımlar qalereyanın zəngin eksponatlarına baxdılar, boyama, toxuma prosesini maraqla izlədilər, xalçaçı qızlarla səmimi söhbət etdilər. Əminə xanım və qızı Sümeyyə onların köməyi ilə, özlərinin də dediyi kimi, ömürlərində ilk dəfə olaraq bir neçə ilmə vurdular. Mehriban xanım isə böyüklərdən bu sənətin sirlərini səylə öyrənən 6 yaşlı Həlimə ilə söhbət etdi, xalçaçı qızların güzəranı, maddi-məişət şəraiti ilə bağlı suallar verdi.

Onların əməyinə, sənətinə belə yüksək qiymət verən Mehriban Əliyeva və Əminə Ərdoğanın qayğıkeşliyi, səmimiyyəti xalçaçı qızlarda xoş ovqat yaratdı. Azərbaycanın birinci xanımı və Türkiyə hökuməti başçısının xanımı xalçaçı qızlara işlərində uğurlar arzuladılar.

Əminə xanım Ərdoğan Azərbaycan xalçalarının gözəlliyindən, ölkəmizdə bu qədim el sənətinin belə məhəbbətlə yaşadılmasından məmnun qaldığını, bu xalça muzeyindən zəngin, unudulmaz təəssürat aldığını bildirdi.

Hörmətli qonağa xatirə olaraq hədiyyə verildi.

Azərbaycan.- 2007.- 10 mart.- S. 6.