Nərimanqızı N., Kərimova V.

Fəxriyyə Xələfova : Üç rəngli bayrağımızda Azərbaycanın bütün ruhu duyulur

Türkiyənin xüsusi Ali bədii dizayn mərkəzinin və Bakı Dövlət Universitetinin məzunu, psixoloq, Azərbaycan Rəssamlar İttifaqının üzvü, əməkdar incəsənət xadimi Fəxriyyə Xələfovanın adı bu gün hamıya tanışdır. Peşəkarlıqla yaratdığı gözəl kolleksiyaları ilə Azərbaycanda və onun hüdudlarından kənarda tanınan Fəxriyyə Xələfova bir çox ölkələrdə keçirilən moda festivallarında fərqli geyim kolleksiyaları ilə respublikamızı layiqincə təmsil edir.

O, Türkiyənin CNR Sərgi Mərkəzində keçirilən “9-cu Beynəlxalq İstanbul Moda sərgisi”ndə də uğurlar qazanıb. Onun rəhbərlik etdiyi Moda və Dizayn Mərkəzi üçün uğurla başlayan 2007-ci il yaradıcı heyətin fəaliyyətinin 10-cu ili kimi də olduqca əlamətdardır. İstanbul səfərindən yenicə qayıtmış Fəxriyyə xanımla görüşüb, söhbətləşdik.
- Fəxriyyə xanım, siz fevralın 8-10-da Türkiyədə keçirilən moda festivalından yenicə qayıtmısınız. İstərdik ki, oxucularımıza festivalın hansı məqsədlə təşkil olunması və bu tədbirdə iştirakınız barədə məlumat verəsiniz.
- Öncə onu qeyd edim ki, dünyanın iri miqyaslı sərgilərindən biri sayılan “İstanbul Moda Sərgisi”ndə müxtəlif ölkələrdən tanınmış firma və şirkət nümayəndələri iştirak edirdi. Tədbirdə bir sıra məşhur şirkət və modelyerlərin 2007-ci ilin yaz-yay kolleksiyalarının nümayişi, prezentasiyalar, mütəxəssislər üçün seminarlar və müsabiqələrin keçirilməsi, planlı şəkildə reallaşdırıldı. Sərginin əsas məqsədi əvvəlcə İstanbulu moda mərkəzi kimi dünyaya tanıtdırmaq idi. Bu aksiya yüksək səviyyədə təşkil olunmaqla Yaxın Şərq və Şərqi Avropa regionunda aparıcı yer tutmuş, “ Şərq-Qərb” iqtisadi ticarət mərkəzinə çevrilmişdir. Tədbirdə türk və dünya tekstil sektorunun müxtəlif sahələrində fəaliyyət göstərən tanınmış şirkətlərin stendləri təqdim olundu. İlk dəfə olaraq bu nüfuzlu tədbirdə Azərbaycanı təmsil edən Moda və Dizayn Mərkəzinin də fəaliyyəti nəfis şəkildə dizayn edilmiş stend vasitəsilə tamaşıçılara çatdırıldı.
- Moda festivalında Azərbaycan hansı kolleksiya ilə təmsil olunurdu?
- Bu festivalda biz “Cazibə» adlı moda kolleksiyamızı nümayiş etdirdik. Fərəhləndirici haldır ki, təqdim etdiyimiz kolleksiya böyük müvəffəqiyyət qazandı. Qeyd edim ki, bu kolleksiya dünya modasının son tendensiyalarını, habelə milli moda ənənələrini və geyimlərinin rəng çalarlığını özündə əks etdirərək romantik, ekstravaqant stillərin sintezi əsasında yaradılıb. “Cazibə” moda kolleksiyasının nümayişi kütləvi informasiya vasitələrinin xüsusi diqqətinə və böyük tamaşaçı marağına səbəb oldu. Bir çox moda ustaları bizimlə söhbət zamanı öz heyranlıqlarını gizlətmirdilər. Azərbaycan modasının təbliğatı üçün beynəlxalq moda müsabiqələrində və festivallarda iştirak etmək vacibdir. Bu baxımdan İstanbulda keçirilən tədbirdə iştirakımız və qazandığımız nailiyyətlər növbəti uğurlu addımlardan biri sayıla bilər.
- Yaponiyada keçirilən EXRO-2005 Beynəlxalq sərgisi üçün hazırladığınız kolleksiyaya Azərbaycanın bayrağı formasında tikilmiş geyimi daxil etmək ideyası necə yarandı?
-Bu formatı necə yaratdığımı sözlə ifadə etmək indi mənim üçün çətindir. Çünki son nəticə mənim özümü də heyran etmişdi və bunun necə alınması mənim üçün də maraqlı idi. O vaxt çox sevindim ki, yaratdığım bu kolleksiya böyük maraqla qarşılandı. Azərbaycan özü yaradıcı insanlar üçün bir ilham mənbəyidir. Çünki yaradıcıllıqla məşğul olan insanlar assosiativ düşüncəyə malikdirlər. Azərbaycan sözünün özündə çox valehedici bir melodiya var. Bayrağımızda da ölkəmizin bütün ruhu təmsil olunub. Həmin geyim vasitəsilə bütün bunları və vətənimə olan sevgimi təsvir etməyə çalışmışdım və şadam ki, istəyimə çatdım.
- Onlarla valehedici kolleksiyanız həyata vəsiqə qazanıb. Həmin kolleksiyalar və qazandığınız uğurlar barədə nə deyə bilərsiniz?
- Bu illər ərzində “Sirr”, “Misteru”, “Neft İlahəsi”, “Ümid ritmləri”, “Misilsiz dəbdəbə”, “Rhuthms of Hope”, “Ladies of Azerbaijan” və s. kolleksiyalarla tamaşıçıların görüşünə gəlmişik. Rusiyada, Baltikyanı respublikalarda, Yaponiyada, İsveçrədə, Qazaxıstanda və digər ölkələrdə keçirilən moda sərgilərində, müxtəlif səpgili tədbirlərdə iştirak etmişik. Ötən il İsveçrədə keçirilən beynəlxalq tədbirdə “Nüfuzlu və keyfiyyətli lider - Avropa-2006” mükafatına layiq görülmüşəm. Bu mükafat müxtəlif ölkələrdə ayrı-ayrı sahələr üzrə fəaliyyət göstərən insanlara verilir. 2006-cı ildə Qazaxıstanın Alma-Ata şəhərində keçirilən moda həftəsində də ölkəmizi uğurla təmsil edərək mükafata və diplomlara layiq görüldük. Moda həftəsində 2007-ci ilin yay-yaz kolleksiyaları nümayiş etdirildi və biz də həmin mərasimdə orijinal nümunələrdən ibarət kolleksiyalarımızı tamaşaçılara təqdim etdik.
- Son illər hansı geyimlərə daha çox üstünlük verilir?
- İdman üslubunda olan geyimlər üstünlük təşkil edir. Geyim gərək insana yaraşsın və rahat olsun. İdman üslubunda olan geyimlər isə həm rahat, həm də sadədir.
- Normal bədən quruluşunu saxlamaq üçün nə etmək lazımdır?
- Bunun üçün ilk növbədə normal qidalanmaq və idmanla məşğul olmaq gərəkdir ki, hər hansı pəhrizə ehtiyac duyulmasın. Qida rasionuna həmişə diqqət yetirmək lazımdır.
- Əgər qadınlar sizdən xoşbəxtliyin reseptini istəsəydilər, onlara nə deyərdiniz?
- Xoşbəxtliyin resepti sadədir. Səhər yuxudan qalxanda, pəncərəni açıb bir azca yaşıllığa tamaşa etmək, təmiz hava udmaq, sonra sadəcə gülümsəmək və bu təbəssümü bütün sevdiklərinə, yaxınlarına bəxş etmək lazımdır. Yəni xoşbəxt olmaq üçün çox şey tələb olunmur və buna nail olmaq hər birimizin öz əlindədir.

İki sahil.- 2007.- 2 mart.- S. 6.