Fəxriyyə
Xələfovanın “Cazibə”si İstanbulda uğurla
nümayiş olunub
Türkiyənin İstanbul şəhərində IX Beynəlxalq
İstanbul Moda Sərgisi keçirilib. Sərgidə Türkiyə
və dünya toxuculuq sektorunun müxtəlif sahələrində
fəaliyyət göstərən
tanınmış şirkətlərin
stendləri təqdim olunub. Sərginin əsas məqsədi İstanbulu moda mərkəzi kimi dünyaya tanıtmaq ibarət olub. Bu aksiya yüksək
səviyyədə təşkil
olunaraq, Yaxın Şərqdə və Şərqi Avropada diqqəti çəkib. Dünyanın ən iri miqyaslı sərgilərindən biri
sayılan İstanbul Moda Sərgisinə müxtəlif ölkələrdən
olan məşhur firma və şirkət
nümayəndələri qatılıb.
Tədbirdə bir sıra iri şirkətlərin və ünlü modelyerlərin 2007-ci ilin yaz-yay kolleksiyalarının
nümayişi, mütəxəssislər
üçün seminarlar
və müsabiqələr
keçirilib. İlk dəfə bu nüfuzlu tədbirdə Azərbaycanın tanınmış
modelyeri, əməkdar
incəsənət xadimi
Fəxriyyə Xələfova, həmçinin
onun rəhbəri olduğu Moda və Dizayn Mərkəzi təmsil olunub. İstanbulda Fəxriyyə Xələfovanın
"Cazibə" adlı
moda kolleksiyası nümayiş etdirilib. Azərbaycanda və onun hüdudlarından kənarda öz sənəti ilə yaxşı tanınan modelyer indiyədək bir çox ölkələrdə keçirilən
moda festivallarında geyim kolleksiyalarını uğurla sərgiləyərək,
ölkəmizin layiqli
təmsilçisi olub.
Modelyerimizin "Cazibə"si İstanbulda böyük müvəffəqiyyətlə
nümayiş olunaraq,
tanınmış mütəxəssislərin
diqqətini F.Xələfovanın
yaradıcılığına yönəldib. Bu kolleksiya dünya modasındakı son tendensiyaları, həmçinin
milli moda ənənələrini və
geyimlərin rəng çalarlılığını özündə əks etdirməklə, romantik, ekstravaqant stillərin sintezi əsasında hazırlanıb. "Cazibə"nin nümayişi kütləvi informasiya vasitələrinin diqqət
mərkəzində olub
və azərbaycanlı
modelyerin kolleksiyası
geniş işıqlandırılıb.
Sərgidə iştirakı
barədə danışan
F.Xələfova Azərbaycana
olan sevgisini bu müsabiqədəki uğuru ilə bir daha ifadə
etməyə çalışdığını
deyib.
525-ci qəzet.- 2007.- 2 mart.- S. 7.