Ziyadov R.

Bu gün Bakıda Moda və Aksessuarlar sərgisi açılır

Ötən gün Beynəlxalq Mətbuat Mərkəzində İtesa Kaspian şirkəti "Moda Azərbaycan 2007" adlı 1-ci Azərbaycan Beynəlxalq Moda və Aksessuarlar Sərgisinin açılışına həsr olunmuş mətbuat konfransı keçirdi. Ticarət və Sənaye Palatasının vitse-prezidenti Mehman Əhmədov ölkəmizdə açılan bu sərginin yeni layihə olduğunu dilə gətirdi. Bildirdi ki, rəhbərlik etdiyi şirkət 2007-ci ildə belə sərgiləri regionlarda da təşkil edəcək: "Azərbaycanda sərgi mövsümü bu ay başlayır. İlk yarımillik bütün Qafqazda çoxdan səbirsizliklə gözlənilən "Moda və aksessuarlar" sərgisi ilə açılacaq. Sərgidə 20 xarici şirkət iştirak edəcək. Debütünə baxmarayaraq, sərgi Fransa, İtaliya, Almaniya, İspaniya, Hindistan, BƏƏ, Böyük Britaniya, Estoniya, Rusiya və s. daxil olmaqla dünyanın 11 ölkəsindən olan tanınmış hazır geyim istehsalçılarının böyük marağına səbəb olub. Moda və aksessuarlar sərgisi ziyarətçilərin diqqətinə hazır geyim, parçalar, ayaqqabı, çanta, aksessuarlar və idman geyimi kimi məhsullar təqdim edəcək".

Vitse-prezident dünya moda sənayesinin ölkəmizə getdikcə artan maraqlarından danışdı: "Əhalinin alıcılıq qabiliyyətinin artması buna şərait yaradır. Bir çox dünya brendləri artıq bazarda təmsil olunur. Getdikcə daha çox dünya şöhrətli markalar Azərbaycan bazarında öz məhsullarını təqdim etmək niyyətindədir".

Sərginin meneceri Rəna Abutalıbova sərginin ölkəmiz üçün əhəmiyyətindən danışdı. Onun sözlərinə görə, ölkəmizin bu sahədə də inkişaf etməsini müsbət addım kimi qiymətləndirmək olar. O, sərgiyə 15 minə yaxın ziyarətçinin gələcəyini gözlədiklərini dedi: " Sərgi iştirakçıları sırasında dünyada məşhur olan bir çox şirkətlər olacaq. 1-ci Azərbaycan Beynəlxalq Moda və Aksessuarlar sərgisi məhz belə şirkətləri bir araya gətirir. Həmin şirkətlər ölkəmizdə eksklüziv nümayəndə və ya distribütor tapmaq məqsədilə sərgiyə qatılıb. Sərgiyə gələn ziyarətçilər isə təkcə yeni kolleksiyalarla tanış olmaq və modada mövcud olan yeni tendensiyalar barədə məlumat almaq deyil, həm də Azərbaycanda həmin şirkətlərin eksklüziv nümayəndələri olmaq imkanı əldə edə bilərlər. Sərginin təşkilatçıları İtesa Kaspian və onun tərəfdaşı İTE Qroup PLC şirkətləridir.

Azərbaycan Ticarət-Sənaye Palatası və Azərbaycanda İxracın və İnvestisiyaların Təşviqi Fondu bu layihəyə rəsmi dəstək göstərdiyinə görə onlara təşəkkürümüzü bildiririk".

Sonda tədbir iştirakçılarına sərginin açılışı barədə məlumat verildi. Sərgi martın 6-da səhər saat 11:00-da Avropa Qrand Otelində açılacaq.

Xalq cəbhəsi.- 2007.- 6 mart.- S. 12.