Səs
dünyası"nın 60 yaşlı sakini
Mənimlə dostluq əlaqəsi olan az adam
var ki, (baxmayaraq ki, dostlarımın sayı çoxdur) onun təvəllüdü yadımda
qalsın... Doğum günü həmişə
xatirimdə olan və bu əziz
günün xüsusi
qeyd olunmasına hər zaman can atdığım dostlarımdan biri də – əməkdar mədəniyyət işçisi,
Azərbaycan Dövlət
mükafatı laureatı,
milli kinomuzun "Qızıl çıraq"
mükafatına layiq görülmüş, peşəkar
kino ixtisasçısı, ali
dərəcəli səs
operatoru – Əsəd Fərrux oğlu Əsədovdur... 60 yaşının
tamamını (01- Mart
–1947) qeyd etdiyimiz bu əziz və
mehriban insanla 1972-ci ildən başlayan dostluğumuz 35 illik bir dövrü əhatə edir – YAŞIN
MÜBARƏK, ƏSƏD!
Biz, Əsədov Əsədlə Azərbaycanın
neçə-neçə
bölgəsində kino
çəkilişlərində olmuş, həftələrlə
bir yerdə işləmiş, hətta
mehmanxanalarda eyni otağın sakinləri olmuşuq. Asudə saatlarımızda, süfrə
arxasında, şənlik
məclislərində dostlar
həmişə mənim
nəğmə oxumağıma
can atıb, hətta çox zaman təkid ediblər... Belə məclislərdəki "ifalarıma"
yekun vurarkən, hələ 30-35 il bundan öncə Əsəd Əsədovun
söylədiyi fikirləri,
dostlarımın çoxu
indi də "Əsəd demişkən-
dünyada cəmi iki nəfər oxuyan var (yəni
– müğənni). Onun
birincisi – Ramiz Əzizbəylidir. İkincisi
isə Ramizin özü kimi desə – Odur" deyə, təkrar edir və süfrə
arxasında mahnı oxumağıma yenidən can atırlar... TOYLARDA
OXUYUM, ƏSƏD! Hələ gənclik
illərindən öz
nizam-intizamı seçilən Əsəd
Əsədov, atası
Fərrux Əsədovdan
(Allah rəhmət eləsin!) aldığı
kişilik ləyaqətini,
ailə tərbiyəsini,
qardaşı Məqsədlə
birgə bu yaşına qədər miras kimi qoruyub,
ətrafındakılara da
təlqin edib...
ANAN RƏFİQƏ XALANIN GÖZLƏRİ AYDIN OLSUN! Böyük
əxlaq və intellekt sahibi olan Əsəd Əsədov həm də istiqanlı, xoşrəftar və mehriban insandır. Bu xüsusiyyət onun xanımında da var. Məncə
bu keyfiyyətlər Əsədovlar ailəsinin
bəxtəvərliyi olmaqla
bərabər həyatları
boyunca ən yaxşı xasiyyətləri
olacaq (necə ki, var)... TOYLARINDA
ŞƏNLƏNƏK, ƏSƏD!
İşində peşəkar,
peşəkar olduğu
qədər də tələbkar olan səs operatoru Əsəd Əsədovla
ünsiyyətdə olmaq
nə qədər xoşdursa, onunla yaradıcı işə birgə başa vurmaq bir o
qədər də fərqlidir... Mənim
bu yaxınlarda təhvil verdiyim "Yalan" bədii filmindəki işinə gəldikdə, Əsəd
Əsədov xüsusi
can yandırır, ekran əsərinin daha baxımlı olması üçün
bütün səy və bacarıqlarından
istifadə edirdi. Həm də ona görə ki, son – Qarabağ
müharibəsinin ağrı-acılarını əks
etdirən bu filmin mövzusu bir Vətəndaş kimi onu narahat
etməyə bilməzdi...
VƏTƏN SAĞ OLSUN, ƏSƏD!
Ətrafının böyük
hörmətini qazanmış
Əsəd Əsədovun
şirin, məzəli
söhbətlərindən doymaq olmur. O
özünün yeni lətifələrini danışanda
və ya hər hansı bir tanınmış şəxsi təqlid, neçə-neçə
aktyorun daxilindən
"həsəd" hissi
keçdiyinin dəfələrlə
şahidi olmuşam. Əsəd, xüsusi ilə çox sevib, hörmət bəslədiyi xalq şairi, eloğlusu və yəqin ki, qohumu Fikrət
Qocanın lirikasından
nümunələr, ya
da milli qeyrət dolu şeirlərini söyləyəndə
gənc aktyorların necə "dolduğunun",
daxilən necə
"zənginləşdiyinin" şahidi olmuşam. Bu gün Əsəd
Əsədovun 60 yaşı
tamam olur. Neçə-neçə ekran işinin ərsəyə
gəlməsində əməyi
olan, bu filmlərin "səs dünyası"nın yaradıcısı, peşəkar
səs operatoru, "Azərbaycanfilm"in hələ bundan sonra istehsal edəcəyi neçə-neçə dəyərli
ekran əsərlərinin
altına imzasını
atacaq bir sənətkarı – əməkdar mədəniyyət işçisi,
Dövlət mükafatı
laureatı, "Qızıl
çıraq" mükafatı
laureatı Əsəd
Fərrux oğlu Əsədovu 60 yaşının
tamam olması münasibətilə təbrik
edir, özünə möhkəm cansağlığı,
uzun ömür, ailəsinə xoşbəxtlik,
sevimli kino işində yaradıcılıq uğurları
arzu edirəm. Bir daha 60 yaşın mübarək, əziz dostum, Əsəd!
525-ci qəzet.- 2007.- 1 mart.-
S. 7.