Yaşlı aktrisa yalnız ana obrazlarını oynamamalıdır"

Elmira Şabanovanın fikrincə, teatrlarda darıxdırıcı əsərlər səhnələşdirilir

"Sənətə 45 yaşımdan sonra gəldiyim üçün mənə ana obrazlarını həvalə ediblər. Bu, təsadüfi bir gəliş deyil. Teatr və kinoda olmadığım hər günün mənəvi əzablarını özümdə hiss edirdim. Amma qadın üçün ailə önəm daşımalıdır. Efirdən mənə yaraşan obrazları izlədikcə, səhnəyə qayıtmaq arzusu ilə çırpınardım. Amma buna mane olan şəxs var idi. Amma qismət elə gətirdi ki, qarşıda gözləyən tale yolu özü məni yenidən teatr və kino aləminə gətirib çıxardı". Qismətindən narazı olmasa da, sənətə uzun illərdən sonra qayıdışı Elmira Şabanovanın taleyindən öz izlərini buraxıb. Hələ tələbə ikən ilk dəvət aldığı "Səhər" filmindəki Sevda rolundan sonrao, gələcək həyat yoldaşı, kinoreyissor Rüfət Şabanov ilə tanış olub və ailə qurublar. Ailə başçısı həyat yoldaşının sənətlə məşğul olması üçün qarşısında bir o qədər maneələr yaratmayıb. Amma Elmira xanımın dediyinə görə, qayınanası təkidlə onun evdə oturub, ailəsinin qulluğunda durmasını tələb edib. Böyüyün sözünə hörmətlə yanaşan ailə bir müddət onun dediyi ilə oturub-durub. Lakin uzun illər keçsə də, R.Şabanovun anası sözündən dönməyərək, gəlininin teatr və kino aləminə qayıtmasına icazə vermir. Baxmayaraq ki, Sevda obrazından sonra E.Şabanovaya Gürcüstan və yerli kinoreyissorlardan baş rolda çəkilmək üçün bir-birinin ardınca təkliflər gəlirdi. Aktirsanın fikrincə, əgər o, vaxtilə bu dəvətləri qəbul edə bilsəydi, bir çox Azərbaycan kinosundakı baş rolların ifaçısı olardı: "Övladlarımı böyütdüm, indi hamısı ayrı-ayrılıqda ailə-uşaq sahibləridirlər. Öz istəyimləonlardan ayrı yaşayıram. Qalan ömrümü sırf kino və teatr aləminə sərf edəcəyimə söz vermişəm. Rüfət Şabanov ömrünün sonlarında mənim sənətə qayıtmağımı israrla bildirdi. Amma onun mənə ehtiyacı olduğunu görüb, bu dəfə mən razı olmadım. Onun vəfatından bir neçə il sonra Eyyub Yaqubovun "Ana" klipində məni eyni adlı obraza dəvət etdilər. Elə o gündən kliplərdə və teatr, kino aləmində onlarla ana qalereyası yaratmışam. 45 yaşından sonra sənətə qayıdan aktirsa ancaq bu obrazda oynaya bilərdi. Bu, həm də öz içimdən gəlirdi. Bu obrazlar bəzi gənc ailələrin tərbiyəsinə də böyük təsir göstərmişdi. "Gəlinlər" teletamaşasındakı rolumdan sonra bir çox insan yoldaşının anası ilə barışdığını mənə deyirdi. Amma həvəsdi, bəsdi. İndi tamam başqa obrazlar oynamaq arzusundayam".

Teatr səhnəsinə böyük həvəs göstərən aktrisanı ciddi repertuar boşluğu narahat edir: "Düzdür, iki-üç aydan bir teatrlara yeni əsərlər gəlir. Amma süyet xətti ürəyimi açmır. Əvvəlki teatr ənənəsi aktuallığını geridə qoyub. İnsanı darıxdıran, mənasız əsərlər səhnələşdirilir. Bu üzdən də obraz seçməkdə çətinlik çəkirəm. Yaşlı qadın teatr və kinoda ancaq ana obrazları yaratmaq üçün çalışmamalıdır. Əgər dramaturqlar əsərlərini zənginləşdirə bilsələr, teatrlara da axın güclü olar. Son illər dövlətin sənətə böyük diqqəti hiss olunur. Yəqin xırda çatışmazlıqlara da tezliklə öz axarına düşər

Kaspi.- 2007.- 15 mart.- S. 17.