O olmasın, bu olsunun 50 illik yubileyi qeyd edilir

 

Bu günlərdə Mədəniyyət Turizm Nazirliyi Dövlət Film Fondunun təşkilatçılığı ilə "Nizami" kinoteatrında "O olmasın, bu olsun" bədii filminin 50 illik yubileyi keçirilmişdir. Tədbirdə çıxış edən Dövlət Film Fondunun direktoru, əməkdar incəsənət xadimi, tanınmış kinoşünas Cəmil Quliyev filmin 1956-cı ildə Hüseyn Seyidzadənin quruluşunda lentə alındığını bildirdi: "Bu filmin rollarını Əlağa Ağayev, Əhməd Əhmədov, Tamara Gözəlova, Lütfəli Abdullayev, Mövsüm Sənani kimi dahi aktyorlar ifa ediblər. Ekran əsəri dünya şöhrətli bəstəkar Üzeyir Hacıbəyovun eyni adlı operettası əsasında çəkilib. Ölməz sənətkarımızın yaratdığı bu film Azərbaycan kino tarixində önəmli yer tutur. Bu gün belə filmlərin istehsalına çox böyük ehtiyac var".
"
O olmasın, bu olsun"da kino sənətinin bütün istiqamətləri öz əksini tapır. Yubiley mərasimində iştirak edən əməkdar incəsənət xadimi, kinoşünas Aydın Kazımzadə 1981-ci ildə filmin 25 illiyinin keçirildiyindən söz açdı: "Həmin vaxt filmdə oynayan aktyorların çoxu yubileydə iştirak edirdi. Çox təəssüf ki/, indi onların heç biri yoxdur. Ancaq onların hər biri Azərbaycan kinosu yaşadıqca yaşayacaq, həmişə hörmətlə yad olunub xatırlanacaqlar".
Sonra filmdən fraqmentlər nümayiş etdirildi.

 

Azərbaycan.- 2007.- 18 mart.- S. 2.