Əbədi muğam layihəsinə start verildi

 

YUNESKO-nun dəstəyi ilə keçirilən tədbirlər iki il davam etdiriləcək

 

YUNESKO-nun Azərbaycan muğamlarına dəstəyi məqsədi ilə nəzərdə tutulan növbəti layihələrdən biri Şirvanşahlar Sarayında həllini tapıb. "Əbədi muğam" adlı proqramın ilk təqdimatı ölkə ziyalıları, dövlət məmurları, xanəndələr xarici şirkət nümayəndələrinin iştirakı ilə keçirilib.

Tədbirdə iştirak edən Avropa Mədəniyyət Parlamentinin üzvü, musiqişünas Cahangir Səlimxanov Azərbaycan muğamının artıq bütün dünyada tanınıb qəbul edildiyini diqqətə çatdırdı. Muğam axşamının silsilə xarakter daşıyacağını bildirən musiqişünas tədbirin hər cümə axşamı eyni məkanda keçiriləcəyini bildirdi. Qeyd edək ki, yerli tamaşaçılar üçün biletlərin qiyməti 2, əcnəbilər üçün isə 10 manat təşkil edəcək.

"Əbədi muğam" layihəsi çərçivəsində ifası dinlənilən Ağaxan Abdullayev "Zabul segah"dəsgah şəklində səsləndirdi. Onu tarda Malik Mansurov, kamançada Elşən Mansurov müşayiət edirdi.

Sonda C.Səlimxanov bildirdi ki, "Əbədi muğam" layihəsi 20 həftə ərzində keçirilməklə iki il davam etdiriləcək. Eyni zamanda, proqramın paytaxt ərazisindən kənar bölgələrdə təqdimatı nəzərdə tutulub. Layihə çərçivəsində muğam konsertlərinin, müsabiqələrin təşkili gözlənilir. Bütün tədbirlər layihənin adını daşıyan topluda öz əksini tapacaq

 

Kaspi.- 2007.- 16 mart.- S. 17.