Turanə

Şirvanşahlarda muğam axşamı

“Şirvanşahlar Saray Kompleksi” Dövlət Tarixi-Memarlıq Qoruq Muzeyində muğam axşamı keçirilib. YUNESKO-nun muğamımıza bir dəstək olaraq həyata keçirdiyi “Əbədi muğam” layihəsi çərçivəsində baş tutan ilk gecədə Mədəniyyət və turizm naziri Əbülfəs Qarayev, xarici ölkələrin Azərbaycandakı səfirliklərinin nümayəndələri, beynəlxalq təşkilatların təmsilçiləri də iştirak edib.

Gecədə “Zabul-segah” dəstgahını ifa edən xanəndə, Xalq artisti Ağaxan Abdullayevi tarda Malik Mansurov, kamançada Elşən Mansurov müşayiət edib. Gecənin qonaqları Azərbaycan muğamının ecazkarlığına, insana mənəvi qida olmasına bir daha şahid olublar.

Tədbirə qatılan Xalq artistləri Habil Əliyev, Arif Babayev, Ramiz Quliyev ölkəmizin birinci xanımı, YUNESKO-nun xoşməramlı səfiri Mehriban Əliyevanın muğamımıza olan diqqət və qayğısından söhbət açıblar. Sənətkarlarımız milli mənəvi sərvətimiz olan muğamın dünya miqyasında tanınmasında Mehriban xanım Əliyevanın yürütdüyü işləri yüksək qiymətləndiriblər. Bildiriblər ki, onun əzmliyi ilə muğam sənətinə bu gün yeni bir həyat bəxş edilib.

Layihə çərçivəsində gələn ilin sonuna kimi konsertlər düzənlənəcək. Hər həftənin çərşənbə günü baş tutacaq muğam axşamlarında sənət ustalarımızın biri-birindən maraqlı çıxışları reallaşacaq. İki il davam edəcək layihə respublikanın bütün bölgələrini əhatə edəcək və bu müddətdə həm qocaman, həm də gənc ifaçıların çıxışları təşkil ediləcək. Belə konsertlərin təşkil olunaraq, muğamımızın təbliğ olunması YUNESKO-nun “Əbədi muğam” layihəsinin ikinci istiqamətidir. İlk iş isə muğamların arxivləşdirilərək, sənədləşdirilməsidir. Bu mərhələdə muğamlarımız əsasən lentlərə alınmalı, elektron disklərə köçürülməlidir.

Muzeyin milli arxitektura elementlərilə işlənilmiş, yenidən qurulan salonunda Ruslan Bayramov və Rəna Rzayevanın əl işləri sərgilənir.

Yeni Azərbaycan.- 2007.- 16 mart.- S. 8.