Martın 27-də
Azərbaycan Prezidenti İlham Əliyev və xanımı
Mehriban Əliyeva zəmanəmizin görkəmli
musiqiçisi və dirijoru, həmyerlimiz Mstislav
Rostropoviçin 80 illiyi şərəfinə Rusiya Prezidenti
Vladimir Putin tərəfindən Dövlət Kreml sarayında
təşkil olunmuş rəsmi qəbulda iştirak
etmişlər.
Qonaqlar arasında maestronun pərəstişkarları -
Avropanın kral ailələrinin üzvləri, Monako knyazı
II Albert, RF hökumətinin rəsmi şəxsləri,
Rusiyanın bəzi regionlarının rəhbərləri
də vardı.
Mstislav ROSTROPOVİÇ qəbulda çıxış
edərək dedi:
- Hörmətli xanımlar və cənablar!
Əziz dostlar!
Mən özümü ən xoşbəxt adam sanıram:
ailəm, dostlarım və həmkarlarım
mənimlədirlər. Bu hədiyyəyə - yubileyi əziz
dostlarımın arasında bayram etməyə görə
sizə və Prezidentə təşəkkür edirəm.
Əgər bu gecə sizin üçün xoş olarsa,
mən daha xoşbəxt olaram. Mən buna çox ümid
bəsləyirəm. Çox sağ olun.
* * *
Sonra Rusiya Prezidenti Vladimir PUTİN çıxış etdi:
- Hörmətli Mstislav Rostropoviç!
Hörmətli xanımlar və cənablar!
Əziz qonaqlar!
Bu gün təkcə vətənimizin mədəniyyətində
deyil, həm də dünya mədəniyyətində
böyük hadisədir. Çünki bu gün biz
görkəmli musiqiçinin və gözəl insanın
yubileyini qeyd edirik. Rostropoviçin əli nəyə
toxunursa-toxunsun, - istər violonçelin kamanı olsun,
istərsə də dirijor çubuğu, fərqi yoxdur, -
hamısından istedad ətri gəlir. Bilirik ki,
Rostropoviçi dünya insanı adlandırırlar.
Həqiqətən də belədir. Lakin onun Rusiyanı
necə həssaslıqla duyduğunu və öz
ölkəsini necə sevdiyini şəxsən mən də
bilirəm, salondakıların çoxu da bilir.
Hakimiyyətdə olan bir çox insanlar Rostropoviç
yaradıcılığını sevirlər. Lakin onun
qüdrəti milyonlarla sadə insanın sevgisindədir.
Mstislav Rostropoviç təkcə görkəmli musiqiçi
deyil, o, həm də 25 ildir xeyriyyəçiliklə
məşğuldur.
Əziz Slava, biz səni yubiley münasibətilə səmimi
qəlbdən, ürəkdən təbrik edirik!
Bu təntənəli gündə bildirmək istəyirəm
ki, mən Mstislav Rostropoviçin Rusiyanın ali
mükafatlarından biri ilə - "Vətən
qarşısında xidmətlərə görə"
ordeninin I dərəcəsi ilə təltif edilməsi
haqqında fərman imzalamışam.
* * *
Sonra Rusiya Prezidenti mükafatı yubilyara təqdim etdi.
* * *
Prezident İlham ƏLİYEV təntənəli qəbulda
çıxış edərək dedi:
- Əziz Slava!
Əziz Qalina Pavlovna!
Hörmətli xanımlar və cənablar!
Bu gün, bu gözəl gündə şanlı yubiley
münasibətilə bütün Azərbaycan xalqının
hərarətli salamını və ən xoş
arzularını əziz həmyerlimizə çatdırmaq
istəyirəm. Azərbaycanda biz belə böyük
həmyerlimizlə fəxr edirik. Bakıda
Rostropoviçlərin adını daşıyan
küçə var. Slava hər il öz vətəninə
gəlir, ustad dərsləri keçir, gənc istedadlara,
xəstə uşaqların müalicəsinə kömək
edir, öz vətəni üçün çox böyük
humanitar iş görür.
Məlum olduğu kimi, Azərbaycan uzunömürlülər
diyarıdır. Dünyanın ən məşhur
uzunömürlü insanı Azərbaycanda yaşamış
və o, 160 yaşınadək ömür
sürmüşdür. Lakin bu, heç də yeganə hal
deyildi. 120-130 il yaşayan çoxlu adam var. Odur ki,
Azərbaycan meyarlarına görə Slava hələ çox
cavandır. Ruhən də gəncdir. O, həmişə
ətrafdakılarda nikbinlik doğurur, həmişə öz
enerjisi, təşəbbüsü və
fəallığı ilə ilham verir. Biz həyatı
sevməyi, həyatdan kam almağı və xeyirxah
işlər görməyi ondan öyrənirik.
Hamı bilir ki, Slava Rostropoviç böyük musiqiçi,
böyük vətənpərvər, böyük humanistdir.
O, ən ağır anlarda belə öz prinsiplərinə
sadiq qalmış, həmişə haqq-ədalət
uğrunda mübarizə aparmış insandır. Lakin necə gözəl insan olduğunu yalnız onu tanıyan adamlar bilirlər. Onun özünə dost bildiyi
adamlar bununla, haqlı olaraq, fəxr edirlər.
Bu gözəl gündə
elan etmək istəyirəm ki, Azərbaycan dövləti
özünün görkəmli
həmyerlisini Azərbaycanın
ən ali
ordeni ilə - Slavanın dostunun adını daşıyan
ordenlə, "Heydər
Əliyev" ordeni ilə təbrik etmişdir. İndi mən bu ordeni təqdim etmək istəyirəm.
* * *
Azərbaycan Prezidenti İlham Əliyev "Heydər Əliyev" ordenini Mstislav Rostropoviçə təqdim
etdi.
* * *
Qəbul başa çatdıqdan sonra Dövlət Kreml sarayında Azərbaycan Prezidenti İlham Əliyevin və Rusiya Prezidenti Vladimir Putinin görüşü
oldu.
Azərbaycan.- 2007.- 28 mart.- S. 2.