Samirə

Ələkbər əminin Təbəssüm ordeni

Bizə də nəsib oldu

Dünən R.Behbudov adına Mahnı Teatrında uşaqların və böyüklərin sevimlisi olan aktyor, rejissor, əməkdar artist, iki dəfə prezident mükafatçısı Ələkbər Hüseynovun "Təbəssüm ordeni" ilə təltif edilməsi mərasimi baş tutdu. Hamımızın "Ələkbər əmi" kimi tanıdığımız aktyora bu rəmzi mükafatı Təbəssüm Ordeni Kapitulasının sədri Marek Mixalyak təqdim edib.
1968-ci ildə Polşanın "Kurier Polski" jurnalının təsis etdiyi bu orden 1979-cu ildə BMT tərəfindən də tanınıb. Orden uşaqların böyüklərə onlar tərəfindən gördükləri məhəbbət və qayğıya cavab kimi səciyyələnir. Dünya üzrə buna alternativ mükafat qeydə alınmayıb. Mütləq qaydada uşağın təqdim etdiyi gülümsəyən Günəş təsvirli ordeni qəbul edərkən laureat bir stəkan limon şirəsini təbəssümlə içməlidir. Təbəssüm ordeninin kavalerləri arasında Hillari və Bill Klintonlar, XIV Dalay-lama, İolanta və Aleksandr Kvasnevskilər, İsveçin kraliçası Silviya, həmçinin müəllimlər, ruhanilər və həkimlər var. Ələkbər Hüseynov ilk azərbaycanlıdır ki, bu ordenə layiq görülüb.

Həftə içi.- 2007.- 14 mart.- S. 8.