“Azərbaycanda Koreya mədəniyyəti və kinosu günləri”

Bu adda toplu işıq üzü görüb

2005-ci il iyunun 25-dən 30-a qədər SEBA (Seul-Baki) Azərbaycan-Koreya Mədəniyyət MübadiləsiAssosiasiyası və Azərbaycan Mədəniyyətinin Dostları Fondunun birgə dəstəyi ilə ölkəmizdə ilk dəfə keçirilmiş Koreya Mədəniyyət Günləri, eyni zamanda, həmin ilin oktyabrın 17-dən 20-ə qədər assosiasiya ilə Koreyanın Özbəkistandakı və Azərbaycandakı səfirliyi ilə birlikdə təşkiledilmiş Koreya Kinosu Günlərinəhəsr edilmiş toplu işıq üzü görüb.

Nəfis tərtibatlı kitabın ilk səhifəsində Azərbaycan Mədəniyyətinin Dostları Fondunun sədri Mehriban Əliyevanın tədbirdəki çıxışı əksini tapıb. SEBA (Seul-Baki) Azərbaycan-Koreya Mədəniyyət Mübadiləsi Assosiasiyasının sədri Ruhəngiz Heydərovanın sözlərinə görə, onlar Azərbaycan-Koreya ikitərəfli əlaqələrinin inkişafında müəyyən rol oynamış, həmçinin müasir dünyada ölkəmizin müsbət imicinin möhkəmləndirməsi üçün xüsusi əhəmiyyəti olan bu tədbirin tarixdə ən parlaq izlər qoymasını istəyirlər.

Kitabda tədbir təşkilatçıları ilə birlikdə qonaqların olduğu yerləri əks etdirən fotolar yerləşdirilib. Eyni zamanda, hər iki tədbir çərçivəsində S.Bəhlulzadə adına sərgi salonu, M.Maqomayev adına Dövlət Filarmoniyası, Azərbaycan Taekvondo Federasiyası ilə tanışlıq, Gülüstan Sarayı, Akademik Opera və Balet Teatrında F.Əmirovun "1001 gecə" baletinin nümayişi, Heydər Əliyev Fondu ilə tanışlıq və Mehriban Əliyeva ilə keçirilən görüş, Heydər Əliyev adına Sarayda keçirilən tədbirlərlə bağlı və vida mərasimindən hazırlanmış yazılar, maraqlı fotolar topluda öz əksini tapıb.

Kitabın son səhifələrində dövlət və ictimai xadimlər -fövqəladə hallar naziri Kəmaləddin Heydərov, Əməkdar incəsənət xadimi Baba Vəziroğlu, təhsil nazirinin müavini Sevda Məmmədəliyeva, akademik Budaq Budaqov, kinoreyissor Eldar Quliyev, Oqtay Mirqasımov, tarix elmləri doktoru Yaqub Mahmudov, Xalq artisti Şəfiqə Məmmədova və başqalarının hər iki tədbirlə bağlı təəssüratları dərc edilib.

Kaspi.- 2007.- 2 mart.- S. 17.