Martın 10-da gənc
rejissorların "Yeni teatr" adlı respublika festivalı
çərçivəsində Aktyorlar Evində Azərbaycan
milli teatrının yaradılmasının 134 illiyinə
həsr olunmuş dəyirmi masa keçirilmişdir.
Mədəniyyət və turizm
naziri Əbülfəs
Qarayev iştirakçıları
10 Mart - Milli Teatr Günü münasibətilə təbrik
etmiş, Həsən
bəy Zərdabi və Nəcəf bəy Vəzirovun təşəbbüsü ilə
Mirzə Fətəli
Axundovun "Lənkəran
xanının vəziri"
və "Hacı Qara" komediyalarının 1873-cü ildə
səhnədə oynanılması
ilə əsası qoyulan milli teatrımızın
ənənələrindən, onun keçdiyi yollardan danışmışdır.
Dövlətimizin mədəniyyətin, eləcə də teatrın inkişafına
böyük diqqət
yetirdiyini vurğulayan
nazir, Azərbaycan Prezidentinin Sərəncamı
ilə Bakının bir sıra teatrlarında
əsaslı təmir
və yenidənqurma işlərinə başlanıldığını
bildirmişdir.
Gənc rejissorların
"Yeni teatr" respublika festivalının
ölkəmizdə ilk
dəfə keçirildiyini
deyən Ə.Qarayev diqqətə çatdırmışdır ki,
indi yaxşı gənc rejissorlar nəsli yetişməkdədir.
Onlar Azərbaycan və dünya klassiklərinin əsərlərinə
cəsarətlə müraciət
edirlər. Gənclərin
quruluşunda indi bizim teatr səhnələrində
Jan Koktonun, Molyerin, Qoqolun, Puşkinin, İlyas Əfəndiyevin əsərləri
tamaşaçılara müvəffəqiyyətlə
təqdim olunur.
Azərbaycan Teatr Xadimləri
İttifaqının sədri,
xalq artisti Azərpaşa Nemətov qeyd etmişdir ki, cari ildə
teatr ictimaiyyəti Teatr Xadimləri İttifaqının 110 və
Azərbaycan İrəvan
Dövlət Dram Teatrının 125 illik yubileylərini də bayram edəcəkdir.
Sonda nazir jurnalistlərin suallarını
cavablandırmışdır.
Azərbaycan.- 2007.- 11 mart.- S. 5.