Gənc rejissorların respublika festivalı başlamışdır

Martın 10-da Aktyorlar Evində Mədəniyyət və Turizm Nazirliyinin və Azərbaycan Teatr Xadimləri İttifaqının birgə təşkilatçılığı ilə Milli Teatr Günü münasibətilə gənc rejissorların "Yeni teatr" adlı respublika festivalının açılış mərasimi olmuşdur.
Mədəniyyət və turizm naziri Əbülfəs Qarayev mərasimi açaraq mədəniyyət xadimlərini əlamətdar gün münasibətilə təbrik etmişdir. Milli teatrımızın 134 illik tarixə malik olduğunu diqqətə çatdıran nazir, onun təməlinin qoyulmasında və inkişafında Mirzə Fətəli Axundovun, Həsən bəy Zərdabinin, Nəcəf bəy Vəzirovun, Cəlil Məmmədquluzadənin, Əbdürrəhim bəy Haqverdiyevin, Hüseyn Cavidin, Cəfər Cabbarlının və başqalarının əvəzsiz xidmətlərindən söz açmışdır.
"Azərbaycan teatr sənətinin inkişaf etdirilməsi haqqında" Prezident İlham Əliyevin 2007-ci il 19 fevral tarixli Sərəncamının teatr sənətimizin tərəqqisinə layiqli töhfə olduğunu vurğulayan Ə.Qarayev demişdir ki, hazırda ölkəmizdə Mədəniyyət və Turizm Nazirliyi sistemində 28 dövlət teatrı fəaliyyət göstərir. Sərəncamdan irəli gələn vəzifələrin yerinə yetirilməsi üçün ümumi teatr prosesini istiqamətləndirmək, yaradıcı kollektivlərin müntəzəm və səmərəli fəaliyyətini təmin etmək məqsədilə nazirlik maliyyə, təşkilati və yaradıcılıq imkanlarından maksimum istifadəyə çalışır. Nazirliyin ictimaiyyətə açıqladığı "2006-2016-cı illər üçün mədəniyyət sahəsində Dövlət İnkişaf Konsepsiyası"nda da milli teatr sənətinin tərəqqisi, yeniləşməsi və beynəlxalq teatr məkanında layiqli yer tutması vacib məqsəd kimi qarşıya qoyulmuşdur.
Martın 10-dan 17-dək davam edəcək festivaldan başlıca məqsəd istedadlı gənc rejissorları üzə çıxarmaq və onların gələcək inkişafına yardımçı olmaqdan ibarətdir. 15 gənc rejissorun qatıldığı bu festivalda ən layiqliləri müəyyənləşdirmək üçün nazir teatr tənqidçiləri qrupuna obyektiv olmağı tövsiyə etmişdir.
Festival aktyorların ifasında tamaşalardan parçaların göstərilməsi ilə açılmışdır.

Azərbaycan.- 2007.- 11 mart.- S. 5.