Ələkbərova M.

Avstriya Milli Kitabxanasının

nümayəndələri Bakıda oldular

Qonaqları Mədəniyyət və Turizm naziri

Əbülfəs Qarayev qəbul etdi

Dünən Mədəniyyət və Turizm naziri Əbülfəs Qarayev Avstriya Milli Kitabxanasının baş direktoru Cohanna Raxinqeri, həmin kitabxananın beynəlxalq əlaqələr üzrə direktoru xanım Elizabet Edhoferi, Avstriya Təhsil, Elm və Mədəniyyət Nazirliyinin mədəniyyət məsələləri üzrə baş direktoru Britte Bökünü və muzey məsələləri üzrə mütəxəssis Doris Karneri qəbul etdi. Görüşdə respublikamızın aparıcı kitabxana və muzey mütəxəssisləri də iştirak edirdi. Xatırladaq ki, qonaqlar səfər çərçivəsində M.F.Axundov adma Milli Kitabxanada, Azərbaycan Dövlət İncəsənət Muzeyində, Musiqi Mədəniyyəti Dövlət Muzeyində, Caz Mərkəzində, Qobustan və Şamaxı rayonundakı kitabxana və muzeylərdə, o cümlədən əsaslı təmir olunmuş Maştağa qəsəbə Kütləvi Kitabxanasında da olublar. Tədbirdə qeyd edildi ki, Avstriya Milli Kitabxanası 1990-cı illərin əvvəllərindən başlayaraq, "Kitab himayədarlığı" layihəsini həyata keçirir. Bununla yanaşı, Avstriya Milli Kitabxanasında Azərbaycanın görkəmli şəxslərinin əlyazmaları xüsusi şəraitdə saxlanılır. Qeyd olunan digər fakt da ondan ibarətdir ki, ümummilli lider Heydər Əliyevin təşəbbüsü ilə Nizaminin "Xəmsə"si Avstriya Milli Kitabxanasında bərpa olunaraq, "Azərbaycan Əlyazmaları" sərgisində nümayiş etdirilir. Görüş ərəfəsində Azərbaycan-Avstriya arasında mədəniyyət əlaqələrinin qurulması, kitabxana və muzey sahələrində əməkdaşlıqla bağlı danışıqlar aparıldı. Qonaqlar göstərilən qayğıya görə təşəkkürlərini bildirərək, ölkələr arasında əlaqələrin daha geniş vüsət alacağını söylədilər.

Mədəniyyət və Turizm naziri Əbülfəs Qarayev isə qonaqlarla söhbətdə kitabxana və muzey sahələrində əməkdaşlığın vacib olduğunu bildirdi: "Mən istərdim ki, Vyanada xüsusi olaraq ölkəmizə həsr olunmuş guşələr açılsın. İki ölkə arasında kitab mübadiləsi geniş şəkildə həyata keçirilsin. Azərbaycan son bir ildə heç bir ölkə ilə bu qədər sıx mədəni əlaqə yaratmayıb. Bu illər ərzində Üzeyir Hacıbəyovun "Arşın mal alan" əsəri Avstriyada tamaşaya qoyulub, onun heykəli ucaldılıb. Avstriya bəstəkarı Motsartın heykəlinin Azərbaycanda ucaldılması haqda düşünürük. Ölkəmizdə teatr işinin yenidən qurulması işində Avstriya şirkətlərinin avadanlıqlarından istifadə olunacaq. Cənub rayonlarımızdan turizm məqsədilə istirahət zonalarının açılması, həmçinin Quba, Qusar rayonlarında yay-qış üçün istifadə olunacaq mərkəzlərin yaradılınası Avstriya şirkətlərinə həvalə olunub. Şadam ki, Azərbaycan haqqında Avstriyada geniş məlumat yayılır".

Avstriya Milli Kitabxanasının baş direktoru Cohanna Raxinqer də öz çıxışında qarşılıqlı əlaqələrin belə vüsət almasından məmnunluğunu ifadə etdi: "Bugünkü görüş iki ölkə arasındakı əlaqələri daha da genişləndirəcək, muzey və kitabxana işində geniş imkanlar açacaq. Səfər çərçivəsində milli kitabxanada eksponatlarla, kitablarla tanış olduq. Məncə də bizim gələcək əməkdaşlığımız daha uğurlu alınacaq".

Daha sonra M.F.Axundov adına Milli Kitabxana və Avstriya Milli Kitabxanası arasında əməkdaşlığa dair memorandum imzalandı. Sonda qonaqlar Ə.Qarayevlə xatirə şəkli çəkdirdilər.

Yaddaş.- 2007.- 15 mart.- S. 2.