Martın 6-da
Azərbaycan Milli Akademik Dram Teatrında Mədəniyyət
və Turizm Nazirliyinin "Azərbaycan teatr sənətinin
inkişaf etdirilməsi haqqında" Prezident
sərəncamından irəli gələn
vəzifələrin yerinə yetirilməsinə həsr olunmuş
geniş kollegiya iclası keçirilmişdir.
Sərəncamı dövlətimizin teatr sənətinin
inkişafına diqqət və qayğısının
nəticəsi kimi dəyərləndirən nazir
Əbülfəs Qarayev mədəniyyət
işçiləri adından Prezident İlham Əliyevə
dərin minnətdarlığını bildirmişdir.
Sərəncamla iştirakçıları tanış
edən nazir bu sənəddən irəli gələn
məsələlərin yerinə yetirilməsi ilə
əlaqədar qarşıda duran vəzifələrdən
danışmışdır. Bildirmişdir ki,
keçirilən kollegiya iclasında başlıca
məqsəd teatrların fəaliyyətini müasir tələblər
səviyyəsinə qaldırmaq üçün rəy
və təklifləri dinləməkdir.
Nazir teatrlarımızın mövcud vəziyyətindən,
bu sahədə həyata keçirilən
tədbirlərdən danışaraq
xatırlatmışdır ki, hazırda Rus Dram Teatrında,
Gənc Tamaşaçılar Teatrında, Kukla Teatrında
əsaslı təmir işləri gedir. Başqa teatrlarda da
əsaslı təmirə başlanacaqdır. Ötən
gün dövlət başçısı Heydər Əliyev
adına Sarayda aparılacaq əsaslı təmir və
yenidənqurma işlərinin layihəsi ilə tanış
olmuş, öz göstərişlərini vermişdir. Saray
martın 16-dan təmirə dayandırılacaqdır.
Nazir onu da vurğulamışdır ki, təkcə
binaların əsaslı təmiri, onların müasir texnika
və avandanlıqla təchizi ilə teatrların
səviyyəsini qaldırmaq mümkün deyildir. Eyni zamanda,
yeni texnika ilə işləməyi bacaran kadrların,
müasir duyumlu rejissor və aktyorların, yaxşı
dramaturji əsərlərin olması da vacib şərtdir.
Ə.Qarayev ötən il uğurla həyata keçirilmiş
mədəniyyət tədbirlərindən, onların
nəticələrindən, teatrlarımızın və
musiqiçilərimizin beynəlxalq festival və
müsabiqələrdə iştirakından, dövlətin
mədəniyyət və incəsənət
işçilərinə qayğısından da
danışmışdır.
Milli Məclisin deputatı, Azərbaycan Milli Elmlər
Akademiyasının müxbir üzvü Nizami Cəfərov,
Teatr Xadimləri İttifaqının sədri Azər Paşa
Nemətov, xalq artistləri Nurəddin Mehdixanlı, Qabil
Quliyev, Amalya Pənahova, Cənnət Səlimova,
sənətşünaslıq doktoru, professor İlham
Rəhimli və başqaları müzakirə edilən
məsələ ilə bağlı fikirlərini bölüşmüş,
təkliflər vermişlər.
Kollegiya iclasında səslənmiş rəy və
təkliflərin ümumiləşdirilməsi
üçün işçi qrupu yaradılmışdır.
Azərbaycan.- 2007.- 7 mart.- S. 2.