Rövşən

Mədəniyyət işçilərinin əmək haqları qaldırılacaq

Əbülfəs Qarayev: "Bundan sonra fəxri adların verilməsi üçün mənə təqdim etdiyiniz siyahı məhdud olsun"

Dünən Dövlət Akademik Milli Dram Teatrında Mədəniyyət və Turizm naziri Əbülfəs Qarayev ölkə Prezidentinin ötən ay teatr sahəsinin inkişafı ilə bağlı imzaladığı sərəncamdan irəli gələn vəzifələrin yerinə yetirilməsi ilə bağlı teatr xadimləri ilə görüşüb.

Görüşdə çıxış edən Ə.Qarayev sərəncamın vaxtında imzalandığını və orada göstərilən işlərin həyata keçirilməsinin vacibliyini vurğulayıb. Ə.Qarayevin sözlərinə görə, Mədəniyyət və Turizm Nazirliyinin fəaliyyət göstərdiyi 1 il 1 ay müddətində teatrlarda yeni və bərpa olunmuş ümumi 78 tamaşa hazırlanıb: "Bu sərəncamdan sonra biz bu səylərimizi daha çox artıracağıq. Sərəncamda göstərildiyi kimi, artıq Azərbaycan Dövlət Gənc TamaşaçılarTeatrı, Azərbaycan Dövlət Rus Dram Teatrı və Azərbaycan Dövlət Kukla Teatrında əsaslı təmir işləri aparılır. Ölkə Prezidenti Heydər Əliyev adına Sarayın layihəsi ilə tanış oldu və martın 16-dan Saray əsaslı təmir işləri üçün müvəqqəti fəaliyyətini dayandıracaq. Azərbaycan Dövlət Pantomima Teatrının, eləcə də İrəvan Dövlət Azərbaycan Dram Teatrı və Şuşa Dövlət Musiqili Dram Teatrının yerləşdiyi binalarda təmir-bərpa işlərinin həyata keçirilməsini də təmin edəcəyik. Həmin teatrların təmiri üçün də layihələr hazırlanacaq. Nəzərdə tutmuşuq ki, il-yarım və ya iki il müddətində Azərbaycanda müasir standartlara cavab verən teatr binaları hazır olsun. Həmin teatrlar müasir avadanlıq və təchizatla təmin olunacaq" (APA). Nazirin sözlərinə görə, teatrlar üçün prodüsserlər və kompüter mütəxəssisləri yetişdiriləcək. Bunun üçün gənc kadrlar təhsil almaq üçün dövlət hesabına müxtəlif ölkələrə göndəriləcək: "Bu il “Teatr haqqında” qanunun qəbulu çox təqdirəlayiq haldır. İnanıram ki, bütün bu məsələləri həll etdikdən sonra maddi vəziyyət də yaxşılaşacaq. Mövsümün əvvəlində mədəniyyət işçilərinin əmək haqlarının qaldırılması da planlaşdırılır. Azərbaycan teatrı yaşamalıdır və bunun üçün biz hər şeyə hazırıq". Ə.Qarayev "2008-2018-ci illərdə Azərbaycan teatrı" Dövlət Proqramının layihəsinin hazırlanması üçün xüsusi komissiyanın yaradıldığını deyib. O, layihənin hazırlanmasında ictimaiyyətin də rəyinin nəzərə alınacağını vurğulayıb. Kollegiyada çıxış edən Milli Məclisin Mədəniyyət məsələləri komissiyasının sədri, millət vəkili Nizami Cəfərov teatrm saxlanılmasının vacibliyini qeyd edib. Teatr Xadimləri İtlifaqının sədri, xalq artisti Azər Paşa Nemətov sərəncamdan irəli gələn vəzifələrin həyata keçirilməsində əllərindən gələni edəcəklərini vurğulayıb.

Nazir görüşdə fəxri adlarla bağlı məsələyə də toxunub: "Artıq Gürcüstan, Baltikyanı ölkələr, Ukraynanın mədəniyyət və incəsənət xadimlərinə fəxri adların verilməsi prosesini davam etdirmir. Dünyanın ən tanınmış ölkələrində də fəxri adlar verilmir. Amma buna baxmayaraq, biz bu ənənəni davam etdirməliyik". Teatr rəhbərlərinə müraciət edən nazir bundan sonra fəxri adların verilməsi üçün ona təqdim olunan siyahıda adları məhdudlaşmasını təklil edib: "Ötən il 100-ə yaxın mədəniyyət işçisi fəxri ada layiq görülüb və bu çox təqdirəlayiq haldır Ancaq sizdən xahiş edirəm ki, bundan sonra fəxri adların verilməsi üçün mənə təqdim etdiyiniz siyahı məhdud olsun və həmin siyahıda yazılan insanlar bu ada həqiqətən də layiq olsun". Nazir İrəvan Dövlət Dram Teatrının 125 və Teatr Xadimləri İttifaqının 110 illiyi münasibəti ilə yaxın günlər də bir sıra mədəniyyət və incəsənət xadimlərinə fəxri adların verilməsinin nəzərdə tutulduğunu də deyib.

Palitra.- 2007.- 7 mart.- S. 12.