Qocayeva A.

Yaddaqalan obrazlar ustası

Azərbaycan teatrının inkişafında böyük xidmətləri olan sənətkarlarımızdan biri də Musiqili Komediya Teatrının aktyoru, bir sıra mükafatlar laureatı Novruz Qartaldır. Onunla anadan olmasının 60, səhnə fəaliyyətinin 40 illiyi ərəfəsində görüşürük.

- Novruz müəllim, 40 il çalışdığınız bu teatrda hansı böyük sənətkarlarla işləmiş və tərəfmüqabil olmusunuz?
- Xoşbəxt sənətkaram ki, görkəmli rejissorumuz Şəmsi Bədəlbəylinin teatr məktəbini keçmişəm. Bu illər ərzində Lutfəli Abdullayev, Nəsibə Zeynalova, Şəfiqə Qasımova, Mobil Əhmədov, Zemfira Quliyeva, Nəcibə Behbudova, Əzizağa Qasımov, Məmmədsadıq Nuriyev, Hacıbaba Bağırov, Səyavuş Aslan kimi adları teatr tariximizə qızıl hərflərlə yazılmış sənətkarlarımızla çiyin-çiyinə çalışmış, onlarla tərəfmüqabil və dost olmuşam. Bu sənətkarlarla respublikamızın bütün bölgələrində qastrol səfərlərində tamaşalar göstərmiş, konsert proqramlarında çıxışlar etmişik.
- Teatr dərsi aldığınız və birlikdə çalışdığınız böyük sənətkarlardan nələri əxz etmisiniz?
- Teatr İnstitutunda dərs aldığım müddətdə görkəmli sənətkarlarımız Adil İsgəndərovdan, Müxlis Qənizadədən, Həsənağa Salayevdən, Həsən Əbluçdan və bir sıra böyük sənətkarlardan sənətin sirlərini, səhnə mədəniyyətini, aktyorluq sənətinə ciddi, yaradıcı münasibəti, böyük-kiçiyin yerini bilməyi əxz etmişəm. Nəsibə xanım mənə analıq edib və mən sənətlə bağlı ondan çox şey görüb-götürmüşəm. Rima Məmmədova və Kamal Həsənovdan rəqs sənətini öyrənmişəm. Teatrda Şəmsi Bədəlbəyli, İlyas Şərifov, Əliheydər Ələkbərov kimi tanınmış rejissorlarla, Böyükağa Mirzəzadə kimi dahi teatr rəssamı ilə, Kamal Abbasov kimi görkəmli dirijorla, Kamal Məmmədov və Səttar Turabov kimi mədəniyyət tariximizdə yaşayacaq sənətkarlarla birlikdə işləmiş və onların məktəbini keçmişəm. Öyrəndiklərimi bu gün gənc aktyorlara həvəslə öyrədirəm.
-İlk rolunuzun sevinci yadınızdadırmı?
- Onu unutmaq çətindir. 1968-ci ildə Ağası Məşədibəyov və Məhərrəm Əlizadənin “Toy kimindir” komediyasında Qoşun rolunu yaratmışam. Bu rolu Lütfəli Abdullayev oynayırdı və dublyoru da Səyavuş Aslan idi. Teatrda heç kimə demədən bu rolu hazırladım və L. Abdullayevdən mənə tamaşa etməsini xahiş etdim. Baxdı, bəyəndi və məni qucaqlayaraq - “Bundan sonra bu rolu sən oynayacaqsan. Sən nə məni, nə də Səyavuşu yamsıladın, özünəməxsus yeni bir Qoşun obrazı yaratdın”-dedi. Televiziyada bu rolu Cahangir Zeynalovla birlikdə oynadıq. Rejissor Rauf Kazımovski digər televiziya tamaşalarında, “Gözün aydın”da Salyanski, “Durna”da Dursun, “Səndən mənə yar olmaz”da Fəğan, “Hicran”da Baləmi və digər rolları tapşırdı.
- Səhnə fəaliyyətinizin böyük bir hissəsi mərhum sənətkarımız Hacıbaba Bağırovla bağlıdır. Onun yaradıcılığınıza nə kimi təsiri olub?
- 40 illik səhnə fəaliyyətimin 30 ilindən çoxu o əvəzsiz sənətkarla bağlıdır. Vaxtilə bu teatrda iki konsert dəstəsi - L. Abdullayevin və N. Zeynalovanın dəstələri olub. S. Aslan, Şəfiqə Qasımova və başqaları L. Abdullayevin dəstəsində, Hacıbaba, mən və bir sıra digər aktyorlar isə Nəsibə xanımın dəstəsində çalışırdıq. Nəsibə xanım səhhəti ilə bağlı müalicəyə gedəndə dəstəni qastrola Hacıbaba aparırdı və sonralar onun öz proqramı oldu. Rüfət Əhmədzadə bu dəstə üçün “Sizin ilə gülə-gülə”, “Bildirçinin bəyliyi”, “92 dəqiqəlik gülüş” və digər əsərlər yazdı və biz birlikdə bu əsərlərdə anşlaqla oynadıq. Nəsibə xanım yenidən qayıdıb özünə dəstə yığanda mən Hacıbabanın yanında qaldım. Saysız-hesabsız teatr tamaşalarında Hacıbaba ilə tərəfmüqabil olmuşam. Elə bir televiziya tamaşamız yoxdur ki, orada onunla birlikdə oynamayım. Hacıbaba eyni zamanda mənim ustadım olub. Gecə saat 3-4-də zəng edərək zarafatlar edir, məni yatmağa qoymurdu. İndi teatrda onun yeri görünür.
-Yaradıcılığınızın ən məhsuldar dövrü hansı illəri əhatə edir?
- 1966-cı ildən başlayaraq bu teatrda saysız-hesabsız rollar yaradaraq bir sıra mükafatlar, mötəbər qurumların fəxri fərmanlarını, diplomlarını almışam, iki il dalbadal “İlin ən yaxşı aktyoru” adına layiq görülmüşəm. Ancaq yaradıcılığımın ən məhsuldar dövrünü 1996-1998-ci illəri hesab edirəm. Rol aldığım bütün tamaşalar anşlaqla keçir, kassada bilet tapılmırdı.
- Repertuardakı hansı tamaşalarda rol almısınız?
- Əksər tamaşalarda rol almışam. “Bəydullanın möhtəşəm toyu”nda Bəydulla, “Volqalı canan”da Müqəddəsov, “Məsmə xala dayımdır”da Mahmudbəyov, “Hərənin öz ulduzu”nda Kələntər kişi, “92 dəqiqəlik gülüş”də Novruzəli, “Əlin cibində olsun”da dilənçi, “Bankir adaxlı”da dilənçilərin padşahı, “Şeytanın yubileyi”ndə Şirvan və digər obrazları yaradıram. Hazırda yeni quruluşda hazırlanan “Subaylarınızdan görəsiniz” tamaşasında Əlipaşa obrazı mənə tapşırılıb. Bütün həyatım, yaradıcılığım teatrla bağlıdır və bundan qürur duyuram.
- Novruz müəllim, sizi yubileyiniz münasibətilə təbrik edir və daha böyük yaradıcılıq uğurları diləyirik.

İki sahil.- 2007.- 6 mart.- S. 6.