Turanə

O olmasın, bu olsun

Opera və Balet Teatrının səhnəsində

Azərbaycan Dövlət Akademik Opera və Balet Teatrının bir-birindən maraqlı repertuarını seyr etmək teatrın qapısından içəri ayaq basan hər bir tamşaçı üçün əsil istirahət olur.

Ötən gün Opera və Balet Teatrının səhnəsində yenə də, Məşədi İbad oynanıldı. Doğrusu, bu gün sadəlövh Məşədi İbadın “məsum” taleyi nəinki bizlərə, hətta dünya tamaşaçısına bəllidir.

Əvvəla, aktyor oyunundan deyil, səhnə tərtibatından danışaq. Dekorasiyalar o qədər inandırıcı, canlı və dolğun görünürdü ki, diqqətlə əsərə aludə olan tamaşaçı bir anlıq Köhnə Bakı məişətini və ictimai həyatını yaşamış olur.

Əsərdə hər bir obraz özü-özlüyündə sanki bir baş qəhrəmandır. Əsər dəfələrlə müxtəlif teatrlarda, hətta şou tipli səhnələrdə o qədər oynanılıb ki, tamaşanın süjet xəttindən, gedişatından söhbət açmağa lüzum görməsək də...

Rüstəm bəy gözünün ağı-qarası bircə qızını, Gülnaz xanımı yaşlı bir tacirə ərə verməklə müflisləşmiş vəziyyətini düzəltmək niyyətindədir. Özünü daxilən qoca hiss etməyən, əslində isə əllini haqlayan Məşədi İbad isə sadəlövhlüyü ilə çevrəsində olan bir neçə dələduzun müftə pul qazancına çevrilir. Tamaşaçılardan bir çoxu, demək olar ki, əsəri yalnız televiziya ekranlarından seyr edib. Elə buna görə də Azər Zeynalovun Məşədisinin tamaşaçıları əsərə onun oyunu ilə o qədər aludə olmuşdular ki, az qala onları səhnədən ayıran sərhəddi aşacaqdılar. Bəlkə də elə sadəlövhlüyü ilə tamaşaçı sevimlisinə çevrilmiş Məşədi özü buna şərait yaradırdı. Bu gün opera ifaçılarının məharətlilərindən olan Azər Zeynalovun Balaşı ilə Məşədisinə nəzər salanda, aktyorda güclü komizmin və artistizmin olması məhz bu tamaşada özünü sübut edir. Xalq artisti Azər Zeynalovun ifasına daha bir lirik-dramatik obraz əlavə olundu.

Musiqili Komediya Teatrında və Opera Baletdə oynanan tamaşaların hər birinin öz yeri var. Belə də olmalıdır, axı məkan fərqliliyi var. Biri çoxlarının yüngül janr kimi yanaşdığı, əslində isə daha da böyük məsuliyyət tələb edən Musiqili Komediya Teatrı, digəri isə repertuarında əksər hallarda çox mürəkkəb əsərlərə yer ayıran Akademik Opera və Balet Teatrı. “O olmasın, bu olsun” Musiqili Komediya Teatrının repertuarına daha çox uyğun gəlsə də özünü Opera və Balet Teatrının səhnəsində də təsdiq etdi.

Yeni Azərbaycan.- 2007.- 2mart.- S. 8.