Elçinin tragikomediyası
"ÜNS" teatrının səhnəsində
Bakının "ÜNS" teatrında xalq
yazıçısı Elçinin "Şekspir" pyesi
əsasında Azərbaycanda ilk ikihissəli antrepriz tamaşasının
premyerası olmuşdur. Bu çox maraqlı layihənin təşəbbüskarı
və təşkilatçısı
incəsənətin təkcə
vurğunu yox, həm də onun incə bilicisi olan professor
Nərgiz Paşayevadır.
Əsər nədən
bəhs edir? Elçinin bütün əsərləri kimi, bakılılara təqdim olunan bu pyesi
də dərin fəlsəfi məna daşıyır. Yəqin
elə buna görə də tamaşaçılar pərdə
enəndən sonra və hələ uzun müddət də səhnədə gördüklərinin təsiri
altında olurlar.
...Yer planetinə
guya başqa qalaktikadan gəldiyini deyən psixiatriya xəstəxanasının təzə
pasiyenti aralarında özlərinin Stalini, böyük aktrisa Sara Bernarı olan xəstələrin yeknəsəq həyatına,
hər gün eyni, bezikdirici işi yerinə yetirən tibb işçilərinin yetərincə
maraqsız keçən
günlərinə son
qoyur. O, burada olanların heç birinə bənzəmir.
O, daxilən işıqlı
və inamlı, xeyirxahlığa və məhəbbətə inanan
adamdır. O, bizim dünyada baş verənlərin çoxunu
başa düşmür.
Dərk etmir ki, belə balaca
planet nə üçün hissələrə
bölünmüşdür, nə üçün insanlar bir-birini öldürürlər, öldürənləri
isə qəhrəman
elan edirlər? Nə üçün insanların dedikləri ilə düşüncəsi
və əməlləri
uyğun gəlmir? Nə üçün onların yaratdığının
çoxu özlərinə
qarşı çevrilir?
Nəhayət, nə üçün onlar bir-birinə etibar etmirlər?..
Yadplanetli isə əmindir ki, möcüzə gözləmək
lazım deyil, möcüzə bizim hər birimizin daxilindədir. Bu, sevmək, bir-birinin dərdinə, sevincinə
şərik olmağı
bacarmaqdır. O, hamını
buna çağırır.
Onun fikrincə, dünyada istedad və incəsənətdən
savayı mükəmməl
heç nə yoxdur. Məgər sevgi istedad deyilmi?!
Dünyanı bütün
pisliklərdən o təmizləməyəcəkmi? Budur həqiqət! Yadplanetli ilə "Sara Bernar" Şekspir faciəsinin qəhrəmanları Romeo
və Cülyettanın
ülvi məhəbbətini
nümayiş etdirərək
sanki onlara tamaşa edənlərə
həyatın başlıca
və ali mənasına inamı təlqin edirlər.
Qəhrəmanlardan birinin
dediyi kimi, bu böyük hissi tərənnüm edən Şekspirə həqiqətən eşq
olsun!
Rejissor Bəhram Osmanovun məharətlə və ilhamla səhnələşdirdiyi
və Raxmaninovun musiqisi ilə müşayiət olunan bu qeyri-adi tamaşada
teatrsevərlər paytaxtımızın
müxtəlif teatrlarında
çalışan sevimli
aktyorlarımızı - xalq
artistləri Səyavuş
Aslanı, Şükufə
Yusupovanı, Məbud
Məhərrəmovu, əməkdar
artistlər Sənubər İsgəndərovanı,
Ayan Mirqasımovanı,
Rafiq Əliyevi, artistlər Fuad Osmanovu və Firdovsi Atakişiyevi bir daha görürlər.
Tamaşanın tərtibatçı
rəssamı Nüsrət
Hacıyevdir.
Müəllif pyesinə
verilən quruluşdan
razı qaldımı?
Onun ideyası tamaşada təcəssümünü
tapdımı?
AzərTAc-ın müxbirinin sualına yazıçı Elçinin
cavabı qısa, ancaq mənalı oldu: "Tamamilə razıyam..."
Tamaşaçılar da
bu fikrə şərikdirlər.
Azərbaycan.-
2007.- 29 mart.- S. 7.