Bəzi kitabxana filialları fəaliyyətini dayandıracaq

Dövlət vəsaitinə qənaət edilir

Mədəniyyət və Turizm Nazirliyinin bəzi kitabxanaların fəaliyyətini dayandırması ilə bağlı məlumatı özünü doğruldur. Nazirliyin kitabxana işi sektorunun müdiri Lətifə Məmmədovanın sözlərinə görə, bəzi kitabxana filiallarının bağlanması nəzərdə tutulub. Onun dediklərindən məlum oldu ki, filiallar bağlandıqdan sonra vaxtilə onlara ayrılan vəsait bir kitabxanaya sərf ediləcək. L.Məmmədova söyləyir ki, burada söhbət əsasən kənd kitabxanalardan gedir: "Yəni 100-150 adam yaşan yerlərdə kitabxana inşa edilib. Az əhali yaşayan yerlərdə çox yaxınlıqda yerləşən kitabxanalara ehtiyac yoxdur. Ona görə də qərara alınıb ki, kitabxanaların filiallarının işi dayandırılsın. Əvəzində digər kitabxanalara ayrılan maliyyə vəsaitinin həcmi artacaq. Yəni kiçik və lazımsız kitabxanalara ayrılan vəsait indi bir kitabxanaya sərf ediləcək ki, bu, həm dövlətin vəsaitinə qənaət edilməsinə səbəb olacaq, həm də böyük kitabxanaların fondunun zənginləşməsi ilə nəticələncək".

Mədəniyyət və Turizm Nazirliyinin əməkdaşının dediyinə görə, artıq bu məqsədlə layihə də hazırlanıb. Layihə təsdiqləndiqdən sonra iş başlayacaq. L.Məmmədova əlavə etdi ki, kitabxanaların fəaliyyəti kütləvi şəkildə dayandırıla bilməz. Çünki kitabxanaların böyük əhəmiyyəti var və burada xeyli sayda insan çalışırlar. Ona görə də hələlik 4 rayonda bu layihə həyata keçiriləcək. Layihə nəticəsində yalnız bir-birinə yaxın yerləşən kitabxanaların bağlanması nəzərdə tutulub.

Kaspi.- 2007.- 20-27 mart.- S. 17.