Milli Kitabxana kompüter sisteminə keçib

M.F.Axundov adına Milli Kitabxana artıq kompüter sisteminə keçib. Bu barədə kitabxananın direktoru Kərim Tahirov bizimlə söhbətində məlumat verdi. Onun sözlərinə görə, kitabxananın internet saytı da oxucuların ixtiyarına verilib: "Milli Kitabxananın kompüter sisteminə keçməsi oxucular və kitabxana işçiləri üçün də əlverişli, rahatdır. Oxucular axtardıqları ədəbiyyat siyahısını əvvəlki vaxtlara nisbətən indi rahat şəkildə tapa bilirlər. Əvvələr oxucularımız sözügedən problemlə demək olar ki, həmişə qarşılaşırdılar. İstədikləri kitabları tapa bilmirdilər. Halbuki onların axtardıqları ədəbiyyat kitabxanamızda var. Kitabxananın internet saytı da yaradılıb. Oxucular arsında apardığımız manitorinq zamanı məlum oldu ki, mütamadi olaraq kitabxananın saytına müraciət edilir. İnternet saytımız yaradıldıqdan sonra 20012 nəfər ondan istifadə edib. Onu da əlavə edim ki, təkcə fevral ayı ərzində 2755 nəfər internet saytına müracət edib. Müşahidələr onu deməyə əsas verir ki, internet saytının açılması oxuculara çox kömək edir. Həmin sayta əsasən oxucuların ən çox istifadə etdiyi ədəbiyyatların siyahısını yerləşdirmişik".

Kitabxananın oxucularının siyahısını nə qədər təşkil etməsinə gəldikdə, K.Tahirov dedi ki, bu rəqəm hər ay artır: "Milli Kitabxana olduğundan bizə müraciət edənlərin sayı hər ay artır. Keçən ilin göstəricilərinə görə 35 minə yaxın oxucumuz qeydiyyatdan keçib. Butövlükdə oxucuların sayı 245 mindən artıqdır. Hər gün kitabxanaya 736-820 nəfər oxucu gəlir. Onların hamısı lazım olan ədəbiyyatları sərbəst və əziyyət çəkmədən kötürüb oxuyur". Kitabxananın direktoru dünya ölkələrinin 56 məhşur kitabxanasıyla əməkdaşlıq etdiyini dedi: "2006-cı ildə dünya kitabxanalarından 1237 kitab almışıq, 928 kitab isə xarici kitab evlərinə göndərilib. Biz ötən il ərzində Avstriya, Rusiya, Türkmənistan, Türkiyə, Latviya, Qazaxıstan və s. ölkələrlə əlaqələri genişləndirmişik".

Bəs oxucular yeni sistemlə bağlı nə düşünür? BDU-nun tələbəsi Zümrüd Qurbanova M.F.Axundov adına Milli Kitabxananın kompüter siteminə keçəsini alqışladığını dedi. Amma o, ədəbiyyatların az olmasından gileyləndi: "Yeni sistemə keçilməsi yaxşı haldır. Ancaq elə ədəbiyyat lazım olur ki, onları kompüterdə tapmaq olmur. Belədə əlavə nə qədər vaxt sər etməli oluruq. Oxucu zalları qışda soyuq, yayda isə isti olur. Biz oxucular bundan əziyyət çəkirik".

Xalq cəbhəsi.- 2007.- 13 mart.- S. 13.