Əliyeva A.

Milli Akademiya Kitabxanası üçün yeni bina inşa ediləcək

Azərbaycan Respublikasının Prezidenti İlham Əliyev bu günlərdə “Azərbaycanda kitabxana fəaliyyətinin yaxşılaşdırılması haqqında” sərəncam imzalamışdır. Sərəncam Azərbaycan kitabxana ictimaiyyəti tərəfindən böyük razılıq hissi ilə qarşılanmışdır. Sərəncama əsasən Mədəniyyət və Turizm Nazirliyinə, Rabitə və İnformasiya Texnologiyaları Nazirliyi ilə birlikdə Azərbaycan Milli Kitabxanasının fəaliyyətinin təkmilləşdirilməsi, müasir informasiya texnologiyaları ilə təmin edilməsi və maddi-texniki bazanın möhkəmləndirilməsi ilə bağlı tədbirlər planı hazırlanması tapşırılmışdır. Azərbaycan Respublika Prezidentinin sərəncamında Azərbaycan Milli Elmlər Akademiyası “Akademiya şəhərciyi”nin ərazisində Azərbaycan Milli Elmlər Akademiyasının Mərkəzi Elmi Kitabxanası üçün binanın tikilməsi barədə möhtərəm Prezidentimiz İlham Əliyevin göstərişi çoxminlik oxucuların, elm adamlarının, eləcə də kitabxana kollektivinin sevincinə səbəb olmuşdur.
Azərbaycan kitabxana işi tarixində ilk dəfədir ki, kitabxana işini, onun əhəmiyyətini, cəmiyyətdə tutduğu mövqeyi, müasir informasiya cəmiyyəti şəraitində kitabxanaların vəzifələrini, gələcək inkişaf istiqamətlərini və perspektivlərini müəyyənləşdirən böyük proqram əhəmiyyətli bir sənəd qəbul edilmişdir. Bu, müstəqilliyimizin, milli ideologiyamızın durmadan inkişaf edib təkmilləşdiyi bir şəraitdə respublikamızda kitabxana işinin yaxın gələcək üçün inkişaf proqramıdır.
Belə bir sənədin imzalanması dövlət başçısının Azərbaycan mədəniyyətinin ayrılmaz tərkib hissəsi olan kitab və kitabxana işinə böyük qayğısının təzahürüdür. Azərbaycan Milli Elmlər Akademiyasının çoxminli alimlər ordusu, kitabxana şəbəkəsinin əməkdaşları və oxucuları möhtərəm Prezidentimiz cənab İlham Əliyevin imzaladığı sərəncamı dərin minnətdarlıqla qarşılamışlar.
Sərəncamda müstəqil Azərbaycan Respublikasının informasiya cəmiyyətinə doğru intensiv inkişaf vəzifələrinə müvafiq olaraq ölkə kitabxanalarının dünya informasiya məkanına daxil edilməsi məqsədilə prioritet istiqamətlər müəyyənləşdirilmiş, bu haqda dövlət orqanlarına müvafiq tapşırıqlar verilmişdir.
Bu ali dövlət sənədində AMEA-nın “Akademiya şəhərciyi”ndə Milli Elmlər Akademiyasının Mərkəzi Elmi Kitabxanası üçün yeni binanın tikilməsi sərəncamı akademiyanın çoxsahəli kitabxana şəbəkəsi işçilərini xüsusən sevindirmişdir.
Bu gün biz qürur hissi ilə deyə bilərik ki, AMEA-nın öz fəaliyyəti dövründə qazandığı ən böyük nailiyyətlərdən biri, onun zəngin kitab-informasiya ehtiyatları və bu informasiyanı toplayan, mühafizə və elmin inkişafı naminə istifadə edən Mərkəzi Elmi Kitabxanadır.
Dünya elmşünaslığı və elm tarixi göstərir ki, hər bir ölkədə elmin inkişafı, elmi tədqiqatların səmərəli təşkili və onların nəticələrinin cəmiyyətin sosial-iqtisadi və mədəni -mənəvi həyatına tətbiqi əsaslı dərəcədə mürəkkəb proseslərin kitabxana-informasiya təminatından asılıdır.
AMEA-nın tarixi təcrübəsi təsdiq edir ki, onun yüksək intellektual səviyyəyə qalxmasında, elmi potensialının formalaşması və təşəkkülündə akademiyanın Mərkəzi Elmi Kitabxanası, burada toplanmış zəngin informasiya daşıyıcıları müstəsna rol oynamışlar. Mərkəzi Elmi Kitabxanada formalaşmış 3 milyon nüsxədən yuxarı sənəd-informasiya kütləsi dünya elmi fikrinin tarixi nailiyyətlərini əks etdirən, alimlərin təfəkkürünün bəhrəsi, elmimizi yaşadan və inkişaf etdirən mənəvi xəzinədir. O, elmimizin qüvvəti və qüdrətidir.
Keçən əsrin 20-ci illərində əsası qoyulmuş Milli Elmlər Akademiyasının Mərkəzi Elmi Kitabxanası 80 ildən artıq bir dövr ərzində olduqca intensiv inkişaf edərək müasir dövrdə elmimizin mühüm infrastrukturu, ayrılmaz tərkib hissəsi kimi onun inkişafına səmərəli təsir göstərən elmi informasiya mərkəzinə çevrilmişdir. Hər il bu kitabxanadan 40 mindən artıq oxucuya 2,5-3 milyon nüsxə Azərbaycan, rus və digər dillərdə ədəbiyyat verilir.
Mərkəzi Elmi Kitabxananın elmi-biblioqrafik əsərləri, informasiya nəşrləri, ktabxana işinə dair nəzəri və metodik vəsaitləri elmi işçilərə kitabxana-informasiya xidmətinin təkmilləşdirilməsində mühüm rol oynayır.
Mərkəzi Elmi Kitabxananın beynəlxalq əlaqələri alimlərimizin dünya elmi-texniki fikrin nailiyyətləri ilə tanış olmaqda, eyni zamanda Azərbaycan elminin dünya miqyasında təbliğ edilməsi və yayılmasında mühüm vasitədir.
Onu da qeyd etməliyik ki, Mərkəzi Elmi Kitabxananın ildən-ilə artan informasiya potensialı bu zəngin xəzinənin yerləşdirilməsi və səmərəli istifadəsi baxımından xeyli çətinliklər yaratmış və kitabxananın yeni bina ilə təmin edilməsi zərurətini aktuallaşdırmışdı.
Bu zərurətin vaxtında nəzərə alınması və kitabxana üçün yeni müasir binanın tikilməsi üçün imzaladığı sərəncama görə AMEA-nın çoxminli alimlər ordusu və kitabxana işçiləri hörmətli Prezidentimiz İlham Əliyev cənablarına dərin minnətdarlığını bildirirlər.

Şübhəsiz ki, Mərkəzi Elmi Kitabxananın yeni bina ilə təmin edilməsi ölkəmizdə aparılan elmi-tədqiqat işlərinin informasiya təminatının keyfiyyətcə əsaslı surətdə yeniləşməsi və genişlənməsinə səbəb olacaqdır.
Bu sərəncam bir daha sübut edir ki, cənab Prezident İlham Əliyev vaxtilə kitabxananı “xalq, millət üçün, cəmiyyət üçün müqəddəs bir yer, mənəviyyat, bilik, zəka mənbəyi” kimi qiymətləndirmiş ulu öndərimiz Heydər Əliyevin bütün sahələrdə olduğu kimi, kitabxana işi sahəsində də müdrik siyasətini uğurla davam etdirən görkəmli dövlət xadimidir.
AMEA-nın Mərkəzi Elmi Kitabxanasının kollektivi hörmətli Prezidentimizi əmin etmək istəyir ki, bu yaradıcı kollektiv özünün bütün elmi potensialını səfərbər edərək, onun Azərbaycanda kitabxana işinin yaxşıladırılmasına yönəlmiş sərəncamında irəli sürülən vəzifələrin həlli, gələcək inkişafı naminə daha əzmlə çalışacaqdır.

Xalq qəzeti.-2007.-24 may.-S.8.