Əsədov B

Əsədov B.

Açıq Cəmiyyət İnstitutu - Yardım Fondu - Azərbaycan təşkilatının himayəsi, "Caldion Parfümeriya" şirkətinin dəstəyi ilə Bakı Kitab Klubunun Vəcihə Səmədova adına sərgi salonunda keçirdiyi III Respublika kitab satış-sərgisinə yekun vurulub. Sərgidə ölkəmizin aparıcı nəşriyyatları ilə yanaşı, İran İslam Respublikası "Əl-Huda" nəşriyyatının Bakı bölməsi də iştirak edib, habelə Türkiyə, ABŞ səfirliklərinin və Rusiyanın "Qrand-Fair" nəşriyyatının kitabları nümayiş etdirilib. Oxucu seçimi nominasiyası üzrə səsverməyə 800 nəfərdən çox oxucu qatılıb. Sərginin gedişində 1667 manatlıq 667 kitab satılıb, lotereya oyununda oxucular 80 dəst kitabla mükafatlandırılıblar.
Müsabiqəyə təqdim olunmuş 60 adda kitab arasında ən yaxşı nəşriyyat işi nominasiyasında "Əbilov, Zeynalov və oğulları" nəşriyyatında üç dildə buraxılmış Elxan Süleymanovun "Xocalı soyqırımı: milyon imza - bir tələb", Əziz Ələkbərlinin "Qərbi Azərbaycan abidələri" (beş dildə, "Nurlan" nəşriyyatı) və Rövşən Novruzoğlunun "GenosidE Ecosid" ("Adiloğlu" nəşriyyatı), ən yaxşı poliqrafik icraya görə yenə E.Süleymanovun "Xocalı soyqırımı: milyon imza - bir tələb" və R.Novruzoğlunun "GenosidE Ecosid", həmçinin Firdovsinin "Şahnamə" ("Nurlar" nəşriyyatı) və "Lətif Kərimov: "həyatı və yaradıcılığı" ("Alt-poliqraf" nəşriyyatı) kitabları ən çox xal toplayıblar. "Altun kitab" nəşriyyatının çap etdiyi "Zəka oyunları", o cümlədən "Yaşıl kitab" ("Tutu" nəşriyyatı), O.Pamukun "Mənim adım qırmızı" ("Qanun" nəşriyyatı) kitabları daha çox satılıb. "Tutu" nəşriyyatında işıq üzü görmüş "Shaki Khan Palace", habelə İlqar Hüseynovun və Nigar Əfəndiyevanın "Turizmin əsasları" ("Mars-Print" nəşriyyatı), Akif Kərimlinin "Zəngilan. Şəxsi igidlik" ("Avropa" nəşriyyatı) kitabları oxucu seçimində qalib gəliblər.
Bu dörd əsas nominasiyadan əlavə, sərgidə fəal iştirakına görə "Şirvannəşr", "Zəkioğlu", "Osmanlı Yayınları" nəşriyyatları və Multimedia Mərkəzi Bakı Kitab Klubunun fəxri diplomlarına layiq görülüblər.

Azərbaycan.-2007.-25 may.-S.8.