Xatun

Kitabxanaların müasirləşdirilməsinə 200 milyon tələb olunur

İşçi qrupunun gəldiyi ilkin qənaət belədir

Azərbaycanda 12 minə yaxın kitabxana fəaliyyət göstərir. Lakin onların heç də hamısının fəaliyyətini qənaətbəxş hesab etmək olmaz. Çünki bu kitabxanaların hazırkı vəziyyəti müasir tələblərdən çox geri qalır. Kitabxanaların dünyaya çıxış imkanları olduqca zəifdir. Mədəniyyət və Turizm Nazirliyinin tabeliyində olan kitabxanalarda məhdud sayda kompüter avadanlığı var. Cəmi 14 kitabxananın internetə çıxış imkanı mövcuddur.

Paytaxtdan fərqli olaraq, regionlarda bu vəziyyət daha acınacaqlıdır. Kənd kitabxanalarında kompüterlərdən söz açmağa dəyməz. Kitabxanaların ağır durumunun aradan qaldırılması və inkişafı üçün 2007-2011-ci illər üzrə Dövlət Proqramı təsdiqlənib. Proqramda digər problemlərin həlli ilə yanaşı kitabxanaları kompüterləşdirilməsi nəzərdə tutulur. Qeyd edək ki, Rabitə və İnformasiya Texnologiyaları Nazirliyi Mədəniyyət və Turizm Nazirliyi ilə birgə bu sahədə iş aparır. Kitabxanaların müasir təlabata cavab verən informasiya texnologiyaları ilə təmin edilməsi və maddi-texniki bazasının möhkəmləndirilməsi yönündə addımlar atır. Buna uyğun olaraq bütün kitabxanalar və onların internetə çıxış imkanı yaradılacaq.

"Respublika ərazisindəki 12 min kitabxananın müasirləşdirilməsi üçün 200 milyon manat vəsait tələb olunur". Ölkə başçısı İlhaın Əliyevin kitabxanaların fəaliyyətinin yaxşılaşdırılması haqda sərəncamının icrası ilə bağlı yaradılmış işçi qrupunun gəldiyi ilkin qənaət isə belədir.

İşçi qrupunun üzvü, Mədəniyyət və Turizm Nazirliyi kitabxana işi sektorunun müdiri Lətifə Məmmədovanın məlumatına görə, hazırda ekspertlər kitabxanaların işinin yaxşılaşdırılması üçün görülməli olan əsas tələbləri müəyynləşdirirlər. O qeyd edib ki, işçi qrupu fəaliyyətini iki istiqamətdə aparmaq niyyətindədir. Birinci istiqamətdə kitabxana fondlarının komplektləşdirilməsidir. İkinci istiqamət isə kitabxana sahəsinin informasiyalaşdırılması, kitabxana biblioqrafıya proseslərinin avtomatlaşdırılması və kitabxana fondlarının bərpasıdır.

Ayna.- 2007.- 19 may.- S. 18.