Turanə

Mədəniyyət və Turizm Nazirliyi Şuşanın işğalının 15-ci ildönümü ilə bağlı tədbir keçirib

Dünən M.F.Axundov adına Kitabxanada Şuşanın işğal olunmasının 15-ci ildönümü ilə bağlı tədbir keçirilib. Mədəniyyət və Turizm Nazirliyinin təşəbbüsü ilə reallaşan tədbirdə həm də Çingiz Qacarın rus dilində qələmə aldığı "Qədim Şuşa" kitabının təqdimatı olub.

Mədəniyyət və Turizm naziri Əbülfəs Qarayev artıq 15 ildir ki, Azərbaycanın mirvarisi sayılan Şuşanın həsrətində olduğumuzu deyib. Tədbirdə həm də gənc nəslin nümayəndələrinin olduğunu nəzərə alan nazir xatırladıb ki, böyük imperiyanın siyasətini həyata keçirən bədnam qonşularımız, onlara havadarlıq edən qüvvələrin köməyi nəticəsində musiqimizin beşiyi olan Şuşanı işğal edib. Qərbi Azərbaycan torpaqlarında məskən salan ermənilər yurdumuza öz məskənləri kimi yiyələnməyə çalışıblar. Nazir işğalçıların zəbt olunan torpaqlarda mədəni abidələri, milli sərvətlərimizi dağıtdığını diqqətə çatdırıb. Bu günü kədərli də olsa tarixin unudulmaz səhifəsi adlandıraraq qeyd edib ki, bütün beynəlxalq ictimaiyyətin səylərinə, Azərbaycanın sülhsevərliyinə baxmayaraq, ermənilər hələ də təcavüzkar siyasətini davam etdirir. Nazir Şuşa itkisinin Azərbaycan xalqının hər bir vətəndaşının könül yarası olduğunu deyib. Bu gün ölkə başçısının siyasətinin əsas məqsədinin ədalətin bərqərar olmasından ibarət olduğunu vurğulayan nazir yaxın gələcəkdə Şuşada Azərbaycan bayrağının dalğalanacağını əminliklə söyləyib.

"Bu toplular faciəni yaşamaqla yanaşı, həm də xalqımız arasında birlik yaradacaq" deyən Ə.Qarayev kitabın tək azərbaycanlılar üçün deyil, rusdilli oxucular üçün təşkil olunduğunu diqqətə çatdırıb. Şuşanın İcra Hakimiyyətinin başçısı Nizami Bəhmənov isə Azarbaycanın ən gözəl mədəniyyət ocağı olan Şuşa ilə bağlı xatirələrindən danışıb. AMEA-nın müxbir üzvü Fəridə Məmmədova, millət vəkilləri Hüseynbala Mirələmov, Elman Məmmədov, Azərbaycan Mədəniyyətinə Yardım Dostları Fondunun katibi İbrahim Quliyev Azərbaycanın Konservatoriyası sayılan, cənnətməkan Şuşa ilə bağlı hisslərini bölüşüblər.

Ulu Qacarlar nəslindən olan, nəşrin müəllifi Çingiz Qacar isə kitabın qələmə alınmasında ona yaxından köməklik göstərən şuşalılara minnətdarlığını bildirib.

Tədbirdə "Dağlıq Qarabağ İcması" İctimai Birliyinin əldə etdiyi kadrlar əsasında ekranlaşdırılan Şuşa ilə bağlı sənədli film nümayiş olunub. Filmdə Şuşanın işğaldan sonra və son dövrə aid olan görüntüləri yer alıb.

Yeni Azərbaycan.- 2007.- 9 may.- S. 12.