Dünya İnformasiya Cəmiyyəti günü münasibətilə ümumrespublika toplantısı

Rabitə və İnformasiya Texnologiyaları Nazirliyi ilə Azərbaycan Milli Elmlər Akademiyası (AMEA) İnformasiya Texnologiyaları İnstitutunun birgə təşkilatçılığı ilə Bakı Əyləncə Mərkəzində Dünya İnformasiya Cəmiyyəti gününə həsr olunmuş ümumrespublika toplantısı keçirilmişdir.
Tədbirdə dövlət orqanlarının, elm və təhsil müəssisələrinin, qeyri-hökumət təşkilatlarının, biznes sektorunun nümayəndələri iştirak etmişlər.
Toplantıdan əvvəl mərasim iştirakçıları Fəxri xiyabana gələrək, ümummilli liderimiz Heydər Əliyevin məzarını ziyarət etmişlər.
Rabitə və informasiya texnologiyaları naziri, akademik Əli Abbasov tədbirin əhəmiyyətindən danışmış, Azərbaycan Prezidenti İlham Əliyevin rəhbərliyi ilə ölkədə informasiya cəmiyyətinin qurulması istiqamətində həyata keçirilən tədbirlər barədə məlumat vermişdir. Nazir ötən dövr ərzində informasiya-kommunikasiya texnologiyaları sahəsi üzrə bir sıra mühüm qanunların qəbul edildiyini, rabitə və informasiya texnologiyaları üzrə (İKT) BMT-nin İnkişaf Proqramı, Dünya Bankı və digər beynəlxalq təşkilatlarla birgə bir sıra əhəmiyyətli layihələrin həyata keçirildiyini bildirmişdir. "Azərbaycan Respublikasında rabitə və informasiya texnologiyalarının inkişafı üzrə 2005-2008-ci illər üçün Dövlət Proqramı (Elektron Azərbaycan)"nın məqsədindən danışan natiq proqramın yerinə yetirilməsi üzrə növbəti mərhələnin (2012-ci ilə kimi) tədbirlərinin müəyyənləşdirildiyini qeyd etmişdir.
Sonra AMEA-nın prezidenti Mahmud Kərimov, Azərbaycan Respublikası Prezidenti İcra Aparatının informasiya resursları və texnologiyaları şöbəsinin müdiri Elmir Vəlizadə, Milli Məclisin Elm və təhsil məsələləri daimi komissiyasının sədri, professor Şəmsəddin Hacıyev, Naxçıvan Muxtar Respublikasının rabitə və informasiya texnologiyaları naziri Rövşən Məmmədov ölkəmizdə informasiya cəmiyyətinin qurulması istiqamətində aparılan tədqiqatlar, informasiya cəmiyyəti quruculuğu sahəsində əldə edilən nailiyyətlər, informasiya cəmiyyətinə keçidi təmin edən hüquqi-normativ bazanın yaradılması və inkişaf etdirilməsi istiqamətində görülən işlər, "Elektron Azərbaycan" Dövlət Proqramı çərçivəsində Naxçıvan bölgəsində həyata keçirilən tədbirlər barədə məlumat vermişlər.
Çıxışlardan sonra rabitə və informasiya texnologiyaları nazirinin müavini İltimas Məmmədov "Elektron Azərbaycan" Dövlət Proqramının icra vəziyyəti barədə hesabat məruzəsi ilə çıxış etmişdir. İ.Məmmədov müvafiq Dövlət Proqramının qəbul edilməsindən keçən ilyarım ərzində onun reallaşdırılması istiqamətində görülən işlər barədə ətraflı məlumat vermişdir.
Sonra məruzə ətrafında müzakirələr aparılmışdır.
Azərbaycan Texniki Universitetinin rektoru, professor Havar Məmmədov, AMEA-nın müxbir üzvü, İnformasiya Texnologiyaları İnstitutunun direktoru Rasim Əliquliyev, "Ultra" şirkətinin baş direktoru Tahir Mirkişili və digər natiqlər müasir İKT üzrə kadrların hazırlanması prosesindən, təhsil sistemində İKT-nin tətbiqi sahəsində görülən işlərdən danışmış, ölkədə biznes sektorunun inkişaf etdirilməsi, iqtisadi innovasiya fəaliyyətinin həyata keçirilməsi, bu sahəyə yerli və xarici sərmayənin cəlb edilməsi ilə bağlı təkliflər vermişlər.
Müzakirələrdən sonra RİTN-nin rəsmi veb-portalının təqdimatı keçirilmişdir.

Azərbaycan.-2007.-18 may.-S.7.