İsmayıl Şıxlı adına park qazaxlıların yeni istirahət guşəsidir

Azərbaycan Prezidenti İlham Əliyev mayın 30-da Qazax şəhərinin mərkəzində - Heydər Əliyev prospektində xalq yazıçısı İsmayıl Şıxlının adını daşıyan parkın və ədibin abidəsinin açılışında iştirak etmişdir.
Prezident İlham Əliyev abidənin üzərindən ağ örtüyü götürdü. Dövlətimizin başçısı və xanımı Mehriban Əliyeva abidənin önünə gül dəstələri qoydular.
Abidənin və parkın inşasına 2006-cı ildə başlanılmışdır. 1,2 hektar sahəni əhatə edən parkda görkəmli ədibin qranit postament üzərində 4,2 metr hündürlüyündə heykəli qoyulmuşdur.
Azərbaycan Yazıçılar Birliyi Qazax bölməsinin rəhbəri Barat Vüsal xalq yazıçısı İsmayıl Şıxlının yaradıcılığından, görkəmli ictimai xadim kimi fəaliyyətindən söhbət açdı, onun Azərbaycanın müstəqilliyi yolunda xidmətlərini xatırlatdı. O, ulu öndər Heydər Əliyevin ədəbiyyat, mədəniyyət və incəsənət xadimlərinə diqqət və qayğısını xüsusi vurğuladı, onların yubileylərinin keçirilməsini, xatirələrinin əbədiləşdirilməsinin ölkə ictimaiyyəti tərəfindən razılıqla qarşılandığını bildirdi.
İsmayıl Şıxlının oğlu Elçin Şıxlı Prezident İlham Əliyevə təşəkkür edərək dedi ki, onun Qazax rayonuna, sərhəd bölgəsinə səfəri insanlarda böyük ruh yüksəkliyi doğurur.
Prezident İlham Əliyev Azərbaycan dilinin, tarixinin qorunmasında Heydər Əliyevin xidmətlərini xatırlatdı, ədiblərin bu sahədə fəaliyyətlərini yüksək qiymətləndirdi və dedi ki, onların yaradıcılığına yüksək qiymət verilməlidir. Azərbaycanda bu ənənə Heydər Əliyev dövründən sonra davam etdirilmişdir. Lakin 1990-cı illərin əvvəllərində bu sahəyə diqqət yetirilməmiş, əksinə, bir çox mədəniyyət ocaqlarının bağlanmasına qərar verilmişdir. Lakin ulu öndər əvvəlki ənənəni bərpa edərək Azərbaycanın ədəbiyyat, mədəniyyət xadimlərinə daim böyük diqqət və qayğı göstərmişdir. Bu ənənə bundan sonra da davam edəcəkdir.
Prezident İlham Əliyev xalq yazıçısı İsmayıl Şıxlının Milli Məclisdəki fəaliyyətini xatırlatdı, onun adına parkın salınmasını və burada abidəsinin qoyulmasını ədibin yaradıcılığına verilən yüksək qiymət, xatirəsinə göstərilən ehtiram kimi dəyərləndirdi.

Azərbaycan.-2007.-31 may.-S.4.