Mükərrəmoğlu M.

Beynəlxalq Muzeylər Günü münasibətilə Musiqi Mədəniyyəti Dövlət Muzeyində tədbir keçirildi

Tədbiri giriş sözü ilə açan muzeyin direktoru, əməkdar mədəniyyət işçisi Alla Bayramova son illər ölkəmizdə muzey işinin inkişafına göstərilən böyük qayğıdan danışdı. O bildirdi ki, möhtərəm Prezidentimiz İlham Əliyev bu yaxınlarda ölkədə muzey işinin yaxşılaşdırılması ilə bağlı sərəncam imzalamışdır. Həmin sərəncama əsasən, böyük muzeylərin əsaslı təmiri, eyni zamanda, Xalça Muzeyi üçün yeni binanın tikilməsi nəzərdə tutulur. Muzey işinin inkişafı ilə bağlı yeni dövlət proqramının hazırlanması da sərəncamda öz əksini tapıb. Xalqın mənəvi yaddaşının daşıyıcıları olan muzeylərimiz, doğrudan da, yeniləşir, eksponatları artır.
Bu mənada 40 il bundan əvvəl yaradılmış Azərbaycan Musiqi Mədəniyyəti Dövlət Muzeyinin də fəaliyyəti son vaxtlar güclənmişdir. Bu gün biz muzeyimizin yeni veb saytının təqdimatını keçiririk. Bu layihə xeyli vaxtdır ki, hazırlanır və artıq biz orada kifayət qədər məlumatları yerləşdirə bilmişik.
Tədbirdə çıxış edən mədəniyyət və turizm naziri Əbülfəs Qarayev bütövlükdə mədəniyyətimizin inkişafına dövlət qayğısından danışdı. O, diqqəti möhtərəm Prezidentimizin kino, teatr, muzey işi, kitabxanalarla bağlı verdiyi sərəncamlara yönəldərək bildirdi ki, bunların hər biri mühüm əhəmiyyətə malik sənədlərdir və onlar aid olduqları sahələrin gələcək inkişaf üçün stimul yaradır.
Azərbaycanda muzey işinin zəngin ənənələri var. Dövlət muzeylərimizlə yanaşı, ayrı-ayrı idarə və müəssisələrin də muzeyləri mövcuddur. Bu muzeylər bizim xalqın tarixidir, mənəvi yaddaşımızın canlı nümunələridir. Dövlətimizin rəhbərinin imzaladığı sərəncamda da ölkəmizdə muzey işinin sürətli inkişafı nəzərdə tutulur. Bu günlərdə mədəniyyət işçilərinin böyük bir qrupuna fəxri adların və mükafatların verilməsi ilə bağlı Prezident sərəncamları da mədəniyyət işçilərinin böyük sevincinə səbəb olmuşdur. Elə bu muzeyin direktoru Alla Bayramova da həmin sərəncamla “Əməkdar mədəniyyət işçisi” fəxri adını almışdır. Biz bütün mədəniyyət işçiləri adından cənab Prezidentimizə öz minnətdarlığımızı bildiririk.
Biz muzeylərimizin eksponatlarının dünyaya açılması üçün onların veb saytlarının yaradılmasına xüsusi diqqət yetiririk. Artıq bu muzeyin saytı hazırdır. İndi internet vasitəsilə dünyanın hər yerində onun eksponatları ilə tanış olmaq mümkündür.
Sonra veb saytı (www musicemuseum.az) “Rəqəmli dövr” MMC-nin direktoru Toğrul Əfəndiyev təqdim etdi. Qeyd olundu ki, veb sayta aşağıdakı bölmələr daxildir: layihə haqqında, muzey haqqında, kolleksiyalar, muzeyin fəaliyyəti, muzey məhsulları, xəbərlər, qonaq kitabı, virtual tur, muzeyə gəlmə xəritəsi, video və audio yazılar.
Tədbirin sonunda Beynəlxalq Muzeylər Şurasının prezidenti Alissandra Kumminsin təbrik məktubu oxundu.
Beləliklə, bundan sonra internet vasitəsilə ölkəmizin mənəvi və maddi yaddaşının daşıyıcısı olan Musiqi Mədəniyyəti Dövlət Muzeyi haqqında məlumat əldə etmək mümkün olacaq.


Xalq qəzeti.-2007.-20 may.-S.4.